Patay ang angkas sa usa ka motorsiklo human nadisgrasya sa Upper Busay, Barangay Busay sa Dakbayan sa Sugbo ala 1:30 sa buntag, Lunes, Mayo 12, 2025.
Ang gideklarar nga dead on arrival sa Cebu City Medical Center mao si Luis Rosel Jr., 25, taga Barangay Basak, Dakbayan sa Lapu-Lapu samtang nadala sa Vicente Sotto Memorial Medical Center (VSMMC) ang drayber sa motor nga si Dexy Dave Ochea, 24, taga Purok 3, Sudtunggan, Barangay Basak.
Sa imbestigasyon sa Traffic Enforcement Unit sa Cebu City Police Office nga samtang nagdulhog ang mga biktima sa Transcentral Highway sakay sa motorsiklo padung sa Dakbayan sa Sugbo ug pag abot sa kurbadahon sa Sitio Upper Busay giingong na-overshoot ang motor nga niresulta sa pagka-crash ngadto sa riprap kilid sa karsada.
Tungod sa kakusog sa impact, nangalagpot ang mga biktima sa semento nga karsada hinungdan sa pagkaangkon sa grabeng kadaot sa ilang kalawasan ug ulo.
Dali sila nga gipangdala sa tambalanan sa Dakbayan sa Sugbo apan si Rosel nakabsan sa kinabuhi. / AYB