1 patay, 1 angol sa pagparegla

PAREGLA:Nagbuy-od ang lawas ni Winston Miles Canada, 15, human pusila sa usa ka Dansoy samtang ang iyang kauban nga angol naglingkod. / BRGY. MABOLO
PAREGLA:Nagbuy-od ang lawas ni Winston Miles Canada, 15, human pusila sa usa ka Dansoy samtang ang iyang kauban nga angol naglingkod. / BRGY. MABOLO

Usa ang patay ug usa ang angol sa pagpamusil sa alas 4:20 sa Biyernes sa kaadlawon, Disyembre 29, 2023 sa dalan Borces, corner H. Joaquino Street, Sitio Sta. Cruz, Barangay Mabolo, Dakbayan sa Sugbo.

Paregla ang natino sa kapulisan nga motibo sa pagpamusil sa suspek nga lalaking menor.

Ang biktima nga namatay giila nga si Winston Miles Canada, 15, samtang naa pa sa tambalanan ang laing menor nga 13 anyos, taga Sitio Magtalisay, Brgy. Mabolo.

Ang Mabolo Police Station nakadawat og tawag sa telepono gikan sa barangay tanod sa Mabolo labot sa insidente sa pagpamusil.

Dali nila nga girespundihan sa pagpangulo ni Police Lieutenant Raymart Ravanes, officer-in-charge sa Mabolo Police Station.

Sa imbestigasyon sa Mabolo police, nigawas ang ngalan sa usa ka suspek nga alyas Dansoy, 17-anyos, nagpuyo sa sulod sa Ludo Cemetery sa Barangay Carreta.

Gilusad dayon ang manhunt operation sa kapulisan ug ilang nadakpan ang suspek alas 5 sa Biyernes na sa hapon, Disyembre 29, 2023.

Ang suspek positibo nga giila sa tulo ka mga kauban sa mga biktima sanglit nag-uban sila nga nagbaktas sa lugar diin nahitabo ang pagpamusil.

Matod sa tulo ka mga saksi nga ilang nakita si Dansoy nga sakay sa motorsiklo ug kalit lang namusil tumong kanila sa makadaghang mga higayon nga niresulta sa pagkaigo sa mga biktima.

PAREGLA

Si Police Major Eraño Regidor, hepe sa Mabolo Police, nagkanayon nga bangi sa grupo sa mga batan-on ang hinungdan.

Gikan sa diskuhan ang mga biktima kauban sa mga barkada niini subay sa kapistahan sa maong dapit.

Naundang, matod pa, ang disko tungod sa kagubot nga hinimuan sa grupo ni Dansoy ug sa mga biktima tungod lang sa kasuya.

Naglagot ang grupo ni Dansoy sa grupo sa mga biktima sa dihang wala moduol nila ang mga babaye nga nagdisko usab niadtong tungora.

Tungod sa maong kagubot, mamauli na unta ang mga biktima apan kalit lang nga niabot si Dansoy ug dayong pamusil.

Nakakuha’g CCTV footage ang Mabolo Police diin makita ang paggukod sa suspek sa mga biktima sakay sa iyang motorsiklo ug dayong pamusil sa makadaghan.

Matod ni Regidor nga paregla ang gibuhat ni Dansoy sa mga biktima sa dihang nakita niini nga nagpanon sa pagbaktas.

“Paregla gyud na kay gubot man na sa grupo-grupo sa mga batan-on ba. Mao to human sa disko namusil ning suspek,” matod ni Regidor.

Kasong murder ug frustrated murder ang giandam nga kaso batok kang Dansoy nga gitakdang isang-at sa kapulisan sa sunod se­mana.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph