Patay ang drayber ug kritikal ang iyang angkas sa motorsiklo nga nalimbuwad sa national highway sa Brgy. Poblacion, lungsod sa Liloan, amihanang Sugbo alas 4 sa kaadlawon, Miyerkules, Hulyo 17, 2024.
Gideklarar nga dead on arrival sa ospital ang drayber nga si Edgardo C. Tambago, Jr., hingkod, taga Brgy. Muabog, lungsod sa Tabogon, amihanang Sugbo.
Si Tambago, usa ka production operator sa usa ka kompaniya sa Mactan Economic Zone (MEZ) sa Brgy. Basak, Dakbayan sa Lapu-Lapu.
Samtang kritikal ang angkas nga si Jerwin Belamia, hingkod, taga lungsod sa Dalaguete, habagatang Sugbo, kinsa naa sa usa ka tambalanan sa Dakbayan sa Danao.
Matod ni Police Major Eric Gingoyon, hepe sa Liloan Police Station nga nahinabi sa Superbalita Cebu, nakainom ang mga biktima.
Ang asawa ni Tambago nisulti sa kapulisan nga ang duha gikan sa lungsod sa Carmen ug nagpadulong sa trabahoan.
Nagdali kini aron makauli sab sa ilang giabangang panimalay apan tungod sa pagbunok sa uwan, ang dan dangog.
Ang drayber gikataho nga wala na makakontrolar sa manobela sa motorsiklo hinungdan sa ilang pagkalamba, bisan naka-helmet, nakaangkon gihapon og grabing kadaot sa ulo ug kalawasan tungod sa impact.
“Nakainom gyud sila gikan sa fiesta. Mao nay sulti sa usa ka kaila sa biktima. Unya nagdali kay nag-apas sa oras sa trabaho, nadisgrasya na hinuon,” dugang ni Gingoyon.
Gipadayag niini nga daling nakaresponde ang emergency rescue team sa dapit uban sa kapulisan.
Gidala nila dayon ang mga biktima sa tambalanan sa Dakbayan sa Danao apan si Tambago patay nang niabot.
Si Gingoyon nitambag sa mga motorsista nga maghinay-hinay sa pagpadagan labina kon mag-uwan.
Samtang kon magmaneho og motorsiklo, likayan ang pag-inom og ilimnong makahubog kay risgo sa aksidente. / GPL