Usa ang patay ug laing duha ang nangaangol sa panagbangga sa motorsiklo sa dan sa Purok Magimbuhaton, Barangay Lambusan, lungsod sa San Remigio, alas 5:50 sa hapon, Dominggo, Septiyembre 1, 2024.
Si Teodoro Albaran Tagalog, hamtong ang panuigon ug taga Sitio Luyong Baybay, Barangay Tacup, San Remigio, gideklarar nga dead-on-arrival (DOA) sa mga doktor sa usa ka tambalanan sa dakbayan sa Bogo.
Subay sa imbestigasyon sa kapulisan, wala mag-helmet si Tagalog hinungdang nakaangkog grabing kadaot sa iyang ulo ug sa lawas.
Nasuta usab sa kapulisan nga wala kini lisensiya sa pagmaneho ug giingong nakainom usab kini sa ilimnong makahubog.
Lakip sa naangol mao ang drayber sa laing motorsiklo nga si Leo Dane Raña Ugay, 23, taga Brgy. Casate, lungsod sa Ubay, Bohol nga nakaagi sa naasoy nga dapit.
Nakaangkon sab og minor injuries iyang angkas nga si John Christian Wapanio, 27, taga Brgy. Disularan, lungsod sa Dohero, Bohol.
Si Police Captain Phil Restauro, hepe sa San Remigio Police Station nga nahinabi sa Superbalita Cebu, nagkanayon nga si Ugay ug angkas niini gikan sa Brgy. Arapal, dakbayan sa Bogo.
Niagi sila sa access road sa Lambusan Proper padulong sila sa lungsod sa Tuburan.
Samtang si Tagalog mopadulong sab sa Brgy. Arapal, Bogo kay maghatod og sud-an sa iyang igsuon apan tungod kay hubog, giingong kusog nakapadagan sa iyang motorsiklo.
Sa pagliko niya sa kurbada nga karsada nalapas kini sa pikas lane hinungdan nga nakabangaa ang gikasugat nga motorsiko nga gisakyan sa duha nga taga Bool.
Sa kakusog sa impact, maayong pagkagusbat sa mga motorsiklo.
Ang biktima ingon man sakay sa gikasugat nga motorsiklo nalandig sa tambalanan.
“Ang pamilya mibadlong nga dili na mobiyahe kay lagi hubog. Hatdan man gyud niyag sud-an iyang igsuon sa Bogo City,” matod ni Restauro.
Giingong dunay okasyon sa ilaha, nahingawa sa iyang igsuon nihatud gyud sa sud-an.
Si Ugay gitanggong sa kapulisan samtang nagpaabot kon ang kabanay sa biktima mopasaka og kaso. / GPL