Usa ang patay sa duha ka mga sunog nga ning-igo sa dakbayan sa Tagbilaran, Bohol, sa Sabado sa buntag, Abril 13, 2024.
Ang unang sunog niigo alas 7 sa buntag sa Eastern Cogon Elementary School nga giisa sa first alarm alas 7:21 sa buntag.
Kini nakontrolar alas 7:43 sa buntag ug hingpit nga napawong sa alas 8 sa buntag, matod sa ground commander nga si SF04 Tirso M Galon.
Ang nasunog mao ang lawak sa Grade 6 sa edipisyo nga iya sa Dept. of Education (DepEd) nga nagbilin og danyos nga gibana-banabang P2, 760,000.
Matod ni F03 Dominic De Castro, fire investigator sa Tagbiliran City, nga nagpadayon pa ang ilang imbestigasyon sa hinungdan sa sunog.
PATAY
Samtang ang ikaduhang sunog niigo sa Brgy. San Isidro alas 8:15 sa buntag. Ang balay nga iya ni Marcial Mondin nasunog.
Kini under control alas 9:10 sa buntag ug hingpit nga napawong alas 9:15 sa buntag nga nagbilin og danyos nga P10,000.Matod sa Tagbilaran City Fire Office nga usa ka 35 anyos nga lalaki nga wa sa maayong pangisip ang namatay apan wa nganli.
Giingon nga nag-inusara kini sa balay atol sa sunog.
Gisusi sa Scene of the Crime Operation (Soco) personnel ang dapit samtang nagpadayon pa ang imbestigasyon sa hinungdan sa sunog.