1 sa 4 ka suspek sa pagpatay nasikop

BAHAD: Si Kinjie, 28, taga Brgy. Ermita, dakbayan sa Sugbo nadakpan sa kapulisan sa Carbon Police Station. Usa siya sa upat ka mga suspek sa pagpatay sa usa ka 39 anyos nga lalaki niadtong Huwebes sa gabii. / ARNOLD Y. BUSTAMANTE
BAHAD: Si Kinjie, 28, taga Brgy. Ermita, dakbayan sa Sugbo nadakpan sa kapulisan sa Carbon Police Station. Usa siya sa upat ka mga suspek sa pagpatay sa usa ka 39 anyos nga lalaki niadtong Huwebes sa gabii. / ARNOLD Y. BUSTAMANTE

Usa upat ka mga suspek sa pagpusil patay sa usa ka 39 anyos nga lalaki sa Kawit Street, Barangay Ermita, Dakbayan sa Sugbo alas 10 sa Huwebes sa gabii Mayo 30, 2024, nadakpan sa gilusad nga manhunt operation sa Carbon Police Station sa alas 11:00 sa Biyernes sa buntag, Mayo 31, 2024 sa Sitio Ermita Proper, Brgy. Ermita.

Panagbangi ug dumtanay ang naestablisar nga motibo sa pagpatay kang alyas Ronel.

Ang nasikop nga giila lang sa alyas nga Kinjie, 28, nagpuyo ra usab sa dapit.

Siya gitudlo nga kauban sa tulo ka mga lalaki nga nipusil kang Ronel, taga Barangay Laray, Dakbayan sa Talisay.

Si Ronel nag bike lang sa maong dapit apan kalit lang nangabot ang upat ka mga lalaki, usa ani armado og pistola, dayong pusil sa biktima makaduha ka mga higayon tumong sa ulo.

Gisuwayan pa sa pagtabang ang biktima apan nakabsan sa kinabuhi tungod sa naangkong mga samad niini sa ulo.

Nagpadayon pa ang Carbon police sa ilang pagpangita sa laing tulo nga giila sa mga saksi.

Matod ni Police Major Philip Libres,hepe sa Carbon Police Station, nga personal nga atraso sa biktima ang hinungdan sa pagpamusil.

Matod niya nga dugay na nga ningbahad ang mga suspek sa biktima nga ilang patyon kon mag-abot ang ilang mga dalan.

Si Kinjie nadakpan na kaniadto tungod sa kasong pagpanulis ug nabilanggo sulod sa lima ka tuig sa Cebu City Jail ug nakagawas lang pagka 2022.

Gawas sa mga saksi, nailhan usab sa kapulisan ang mga suspek pinaagi sa kuha sa CCTV camera sa dapit diin nahitabo ang pagpamusil.

Si Kinjie gisuwayan sa pagkuha sa iyang habig apan nidumili sa pagtubag sa mga pangutana.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph