Nabilanggo ang usa ka stepfather sa Guadalupe Police Station 9 nga gipasanginlang nangulata ug nanglugos sa iyang 10 anyos nga stepdaughter sa Sityo Jugas, Kalubihan-Banawa, Barangay Guadalupe, Cebu City.
Mga barangay tanod sa Guadalupe maoy nisikop sa suspek nga si alyas Jun, 38, parcel delivery rider nga lumolupyo sa maong dapit niadtong alas 6:00 sa buntag, Pebrero 18, 2025.
Ang biktima nitug-an sa iyang apuhang babaye nga gikulata siya sa suspek hinungdan nga nidangop sila sa Gender and Development (GAD) office sa Guadalupe aron ireklamo ang suspek.
Si Jane, dili tinuod nga ngalan, nisumbong nga gibunalan siya og wire sa rice cooker sa iyang ama-ama ug naigo ang iyang ulo ug kamot kay nasuko sa dihang nagdumili ang biktima sa moeskuwela.
Nangatarungan ang biktima nga dili siya gusto nga moeskuwela kay iyang isumbong ang suspek nga nagsige og pahimulos kaniya.
Matod ni Jane nga dili lang kausa apan kadaghan kini gibuhat sa suspek.
Tungod sa gikumpisal sa bata, niadto ang mga barangay tanod sa Guadalupe sa balay sa suspek ug ila kining gidakop ug gi-turnover sa kapulisan sa Guadalupe.
Ang kapulisan maoy moandam sa kasong kalapasan sa Sec. 10(a) Article 6 sa RA 7610, anti child abuse law batok sa suspek. / DVG