10 anyos napaig sa sunog; nag-inusaraatol sa hitabo

NAUGDAW: Gitarukan og tulo ka mga kandila ang bahin sa naugdaw nga balay diin napalgan ang paig nga lawas sa 10 anyos nga batang lalaki nga nag-i­nusara ug nahinanok sa iyang pagkatulog, Martes sa kadlawon, Hunyo 4, 2024 sa Borbajo St., Barangay Talamban, Cebu City. Estorya sa pahina 2. / GPL
NAUGDAW: Gitarukan og tulo ka mga kandila ang bahin sa naugdaw nga balay diin napalgan ang paig nga lawas sa 10 anyos nga batang lalaki nga nag-i­nusara ug nahinanok sa iyang pagkatulog, Martes sa kadlawon, Hunyo 4, 2024 sa Borbajo St., Barangay Talamban, Cebu City. Estorya sa pahina 2. / GPL

Napaig ang 10-anyos nga batang lalaki kay naapil sa pagkasunog sa ilang balay alas 2:00 sa kaadlawon sa Martes sa A. Borbajo St., Brgy. Talamban, Dakbayan sa Sugbo.

Ang biktima nga giila nga si Nathan Jade Villamor, gituohan nga wala makagawas tungod sa pakahinanok sa pagkatulog atol sa sunog.

Ang inahan sa bata wala sa ilang balay atol sa sunog kay dunay gilakaw.

Ang apohan wala sab kay sayo nga nangumpra sa Carbon Public Market.

Ang uyoan nga si Debbie Patigayon, usa sa mga nasunogan, nagkanayon nga nakamata na lang siya human gipukaw sa iyang inahan nga nasunog na ilang panimalay.

Sila naningkamot nga makagawas sa balay.

Naluwas sila apan usa sa tulo ka mga balay nga nasunog ilaha.

Nakita nila nga nasunog na ang panimalay diin natulog ang biktima.

“Sa ilaha nagsugod ang sunog. Wala na kabantay ang bata kay natulog man”, sigon ni Patigayon nga nahinabi sa GMA dySS Super Radyo.

Ang inahan sa bata wala diha kay matod pa nagpalit og pagkaon apan giingon nga wala makabalik dayon.

Sa iyang pag-uli naugdaw na ang ilang balay ug patay na ang ilang anak.

Ang inahan gisuwayan unta sa pagkuha sa iyang habig sa mga tigbalita apan nidumili sa pagluwat og pamahayag kay na shock sa nahitabo.

Si Christopher Jade Rabutan, amahan sa bata, nibutyag nga dugay na silang gabuwag sa inahan.

Si Rabutan nipasangil atol sa interbyo sa GMA dySS Super Radyo nga ang iyang anak kanunay nga biyaan sa inahan sukad bata pa.

Sumala pa niini nga naabtan niya makausa ang bata nga naghilak kilid sa pultahan sa ilang panimalay kay gibiyaan sa mama.

Si Police Major Alvino Enguito, hepe sa Talamban Police Station, nagkanayon nga ilang palawman ang imbestigasyon aron masayran kon nganong gibiyaan ang bata.

Gusto silang masayod kon kapila ka higayon nga gibilin sa inahan ang biktima nga nag-inusara.

Samtang gisusi pa sa kabumberohan ang hinungdan sa sunog. Nasuta sa mga bombero nga way kuryente ang panimalay.

Nagpadayon ang imbestigasyon sa pagsubay sa hinungdan sa sunog.

Sa gipagawas nga data sa Cebu City Fire Office, mokabat sa P300,000 ang danyos. / GPL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph