10 ka armas gipangtahan

Moabot sa napulo ka mga armas ang gipangtahan sa Inayawan Police Station gikan sa usa ka security agency nga ni-expire na ang lisensya, alas 12:00 sa udto, Lunes, Disyembre 9, 2024.

Matod sa hepe sa Inayawan nga si P/Major Jeciree Basitao nga ang Stalwart Security and Utility Services nihatod sa 10 ka Smith and Wesson nga mga revolver sa pagpangulo sa tag-iya niini nga si Ramonito Edgar Honoridez alang sa safe keeping samtang gipang-process pa ang mga papeles niini.

Ang maong security agency wala na mag-operate sa pipila ka mga buwan ug tungod niini, ang ilang mga armas nga giisyu sa ilang mga gwardiya ilang gipangkuha.

Dugang ni Basitao nga nagpadayon ang consolidation sa maong security agency sa ilang mga armas ug nipasalig si Honoridez nga duna pa silay laing mga armas ang itahan sa mosunod nga mga adlaw.

"Naa ni silay security agency nga wala na nag-operate. Tanan firearm with expired license nila ilang gipang consolidate and then turned-over sa station for safe keeping," matod ni Basitao.

Ang maong pagtahan sa mga armas kabahin sa ilang hugot nga kampanya batok sa loose firearms ilabi na nga nagsingabot na ang midterm election.

Kon mahuman na sa pagproseso sa ilang mga papeles ang security agency, mamahimo na nila kini nga kuhaon aron magamit sa ilang mga guwardiya. / AYB