Napulo ka panimalay ang gilamoy sa kayo sa managlahing sunog sayo sa buntag sa dakbayan sa Sugbo, Dominggo, Enero 28, 2024.
Unang gilamoy sa kayo ang pito ka panimalay sa sunog sa Lower Cabajar sa Barangay Guadalupe, alas 5:50 sa kaadlawon. Ang kayo nagsugod sa panimalay nga gipanag-iya ni Maria Socorro Piloto.
Giisa sa kabomberuhan ang sunog sa 1st alarm sa alas 5:53 sa kaadlawon. Nakontrolar sa alas 6:16 sa buntag ug gideklarar nga fire out sa alas 6:28 sa buntag.
Sa pito ka panimalay nga nasunog, lima ang hingpit naugdaw.
Ang danyos mokabat sa P854,000.
Si Roxan Claros, residente sa lugar nga nahinabi sa Superbalita Cebu, nagkanayon nga nakabaho sila’g gasolina.
Kalit nga misinggit iyang mga kabanay nga niulbo ang kayo sa likod sa ilang panimalay.
Gisundan sa laing sunog sa tulo ka panimalay, alas 9:14 sa buntag sa Lower Torre, Brgy. Inayawan.
Ang panimalay gipanag-iya ni Arcenio Baral.
Giisa sa 1st alarm ang sunog sa alas 9:21 sa buntag. Nakontrolar sa alas 9:30 sa buntag ug gideklarar nga fire out sa alas 9:50 sa buntag.
Usa ka balay naugdaw ug duha ang nakan-an sa kayo. Ang danyos mokabat sa P500,000.