10 ka coordinators, aser sa illegal swertres, nasikop sa pagronda

Central Visayas
Central VisayasFile

Gipakusgan pa sa kapulisan sa Central Visayas (CV) ang ilang kampanya batok sa ilegal nga sugal, sama sa illegal swertres nga padayong migara sa mga probinsya sa rehiyon 7.

Tungod niini, ang kapulisan, atol sa managlahi nga mga operasyon, nakasikop og 10 ka mga coordinator sa lainlaing mga lugar sa Sugbo.

Ang Balamban Municipal Police Station nakasikop og upat ka mga aser ug usa ka coordinator sa Barangay Baliwagan, Buanoy ug Aliwanay.

Ang mga nadakpan mao silang alyas Irene, 30, ug alyas Jesus, 55, pulos taga Barangay Baliwagan, alyas Julie , 27, taga Barangay Buanoy, ug alyas Dina, 57, residente sa Barangay Sta. Cruz.

Nasakmit gikan kanila ang illegal numbers game paraphernalia ug kwarta nga pusta sa mga nanugal sa swertres.

Nasikop usab ang ilang gitumbok nga coordinator nga si alyas Marcial, 52, taga Baliwagan, kinsa naabtan pa sa mga polis nga nag tally sa mga number combination ug remittance sa iyang ushers.

Nakuha gikan kang Marcial ang calculator, notebook ug gagmay nga mga papel nga dunay mga numero sa swertres, stubs ug uban pa nga mga ebidensya.

Samtang, ang Bantayan Police Station nakasikop usab og usa ka babaye nga nagpataya sa illegal numbers game.

Ang suspek giila nga si alyas Sophia, 29, taga Purok 1, Barangay Lipayran, isla sa Bantayan.

Ang Bantayan Police Station nakadawat og report labot sa pagpataya sa illegal swertres ni alyas Sophia nga tungod ani, ila gilayon nga gipaubos sa monitoring.

Dihang nasuta nga nag-isyo og illegal swertres, ila dayon ni nga gidakop.

Gipangayoan kini og dokumento nga magpamatuod nga legal siya nga nag operate og small town lottery apan wala siyay ikapakita hinungdan nga siya gidakop.

Nasikop usab sa mga sakop sa Criminal Investigation and Detection Group Regional Field Unit 7 ang upat ka mga lalaki nga nag usher sa ilegal nga sugal.

Ang mga suspek giila nga silang alyas Dexter, 30, taga Barangay Vito, Lungsod sa Minglanilla; alyas Efren, 26, taga Purok Malipayon, Barangay Talayong, Lungsod sa Badian; alyas Brix, 29, nagpuyo sa Sitio Curvada, Brgy. Banigan, lungsod sa Badian; ug alyas Limuell, 48, taga Barangay Bato, lungsod sa Badian.

Matod sa usa sa mga operatiba sa CIDG-7 nga si alyas Brix ang gitumbok nga coordinator sa illegal swertres samtang si alyas Limuell giingong staff sa asawa sa usa ka opisyal sa gobyerno sa lungsod sa Badian.

Ang upat naatlan sa CIDG 7 nga mihimo’g transaksyon sa illegal numbers game nga kalapasan sa Republic Act 9287.

Nakuha gikan kanila ang mga gamit sa ilegal nga sugal sama sa bet stub nga dunay nagkalainlaing number combinations, kwarta isip sugal, tally bet stub, carbon paper, ballpen ug uban pa nga mga kagamitan.

Ang Police Regional Office 7 nihingusog pa sa ilang kampanya batok sa illegal numbers game subay sa reklamo sa Philippine Charity Sweepstakes Office (PCSO) nga nakaapekto na sa ilang kita dinhi sa Central Visayas tungod sa padayon nga paghitak sa ilegal nga sugal sama sa illegal swertres ug illegal STL. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph