Moabot og 10 ka oras ang nasinati’ng brownout sa duha ka mga barangay sa lungsod sa Argao, Sugbo sa Sabado sa buntag, Abril 6, 2024 human nasabod ang prime mover sa mga linya sa kuryente ug telecom.
Ang apektado mao ang Brgy. Balisong ug Brgy. Talaga, butyag ni Talaga brgy. konsehal Roldan Camson nga gikahinabi sa Superbalita sa Cebu sa Sabado pinaagi sa telepuno.
Nasabod ang van sa mga linya nga nakatumba sa duha ka mga poste sa Cebeco 1 ug duha ka mga poste sa Globe telecom.
Sa lahi nga interview sa Superbalita Cebu kang Argao Police Station traffic police investigator Patrolman F. Macapanas, nasayran nga ang insidente nahitabo sa national highway sa Brgy. Balisong mga alas 3 sa kaadlawon.
Ang drayber sa prime mover nga may kargang dakong container van giila nga si Nemeul Hemperoso, 33, minyo, taga Lumbangan, Mabinay, Negros Oriental.
Ang drayber gikan sa Tampi sa Santander ug padulong sa Siyudad sa Sugbo, apan pag-abot sa Balisong Argao, wa siya nakamatikod nga may nagyanyan nga wire sa telco mao nga nasabod.
Naapektuhan usab ang mga linya sa kuryente ug duha ka mga balay ang natumbahan sa mga poste apan di grabe.
Matod pa ni Macapanas nga wa pa siyay sumada kon pilay damage sa tanan nga naapektuhan, apan wa nila gikustodiya ang drayber kay dunay amicable settlement nga nakab-ot.