Dugang 10 ka mga tambal ang wala na butangi og value-added tax (VAT) hinungdan nga mas dako ang kahigayonan sa publiko nga makapalit niini sa mas ubos nga presyo.
Base sa Advisory No. 2025-0510, ang Food and Drug Administration (FDA) nipagawas og listahan sa laing ka mga tambal nga dili na buhisan og VAT.
“Provided below are the latest updates on the list of VAT-exempt health products pursuant to Republic Act No. 11534, effective upon the issuance of this advisory,” matod sa FDA.
Naglakip kini sa mga tambal sa cancer nga: Tegafur + Gimeracil + Oteracil Potassium 20 mg/5.8 mg/19.6 mg; ug Tegafur + Gimeracil + Oteracil Potassium 25 mg/7.25 mg/24.5 mg.
Wa na say VAT ang tambal sa diabetes nga Metformin Hydrochloride + Teneligliptin ( hydrobromide hydrate) 1 g/20 mg; ug Metformin Hydrochloride + Teneligliptin ( hydrobromide hydrate) 500 mg/20 mg.
Lakip usab sa 10 ang mga tambal alang sa taas og cholesterol nga Atorvastatin ( calcium) + Fenobribrate 20 mg/160 mg.
Gilista sab sa ahensiya ang mga tambal sa hypertension nga Metoprolol tartrate + Ivabradine (hydrochloride) 50 mg/5 mg; ug Metoprolol tartrate + Ivabradine (hydrochloride) 25 mg/5 mg.
Samtang giapil sa ahensiya sa listahan ang tambal alang sa sakit sa pangisip nga Lamotrigine 5 mg; Lamotrigine 25 mg (oral dispersible tablet); ug Lamotrigine 25 mg (tablet).
Gitangtangan sab og VAT ang laing duha ka tambal sa cancer nga Baricitinib 2 mg; ug Baricitinib 4 mg.