Moabot ngadto sa 103 ka pamilya gikan sa pipila ka mga lokalidad sa Probinsya sa Sugbo subay sa epekto sa bagyong Kristine, Oktubre 24, 2024.
Subay sa uwahing Tropical Wind Signal advisory, gilibkas na ang Signal No. 1 sa Sugbo gawas lang sa isla sa Bantayan.
Bisan pa man niini, gatusan ka mga pamilya ang temporaryong gipabakwit human naapektuhan sa pagkusokuso ni bagyong Kristine sa lalawigan.
Naglakip na sa maong talaan ang 49 ka pamilya sa barangay Dumlog, Dakbayan sa Talisay; 38 ka mga pamilya sa lungsod sa Argao; 14 sa Malabuyoc ug duha sa Minglanilla.
Sagad kanila anaa namuyo sa daplin sa baybayon nga gihulagway nga anaa sa danger zone.
Gawas sa apektadong pamilya, nakatala usab og kadaot ang PDRRMO sa 15 ka mga sakayan; 15 ka mga punuan sa saging, upat ka mga balay ug usa ka punuan sa lubi nga natumba.
Samtang nasangad sa kabaybayonan sa lungsod sa Minglanilla ang usa ka cargo vessel human kini mapadpad tungod sa kusog nga hangin ug bawod.
Si Ensign Abel Lomboy, tigpamaba sa Phil. Coast Guard District Central Visayas (PCG-7), misaysay nga kini nahitabo human maputol ang duha ka mga angkla nga naggunit sa maong barko.
Ang LCT Golden Bella nahimutang 100 metros ang gilay-on gikan sa kabaybayonan sa Sitio Noah, Brgy. Calajoan. Minglanilla.
Gibutyag ni Lomboy nga base sa inisyal nga taho gikan sa ilang units, ang maong barko gikan sa Tawi-Tawi.
Sa pagkakaron, gi-monitor niini ang sitwasyon ug plano nga pag-deploy og mga divers nga mohimo og hull inspection aron masuta kon aduna bay mga leak aron malikayan ug mapangandaman ang posible nga oil spill.
Subay niini ang PDRRMO mipahibawo usab nga maghuwat sa mando ug desisyon sa lokalidad alang sa status sa klase sa matag lugar. / dugang taho ni Dario V. Gil