Dili mominos P100 milyunes danyos sa pagkasunog sa dakong poultry farm sa Sityo Pawa, Barangay Usmad, bukiran sa lungsod sa Argao, ala 1:19 sa hapon sa Martes, Marso 19, 2024.
Kini ang gibutyag ni Argao Municipal Fire Marshal Sr. Insp. Archie Custodio nga gikahinabi sa Superbalita Cebu sa Miyerkules, Marso 20, 2024.
Matod niya nga ang nasunog mao ang usa ka dakong building sa Pinnacle Poultry Farm nga may sud nga 10,000 ka mga manok nga paitlugon nga gipanag-iya sa negusyante nga si Gilbert Yap .
Matod ni Custodio, ang sunog giisa sa first alarm sa ala 1:40 sa hapon ug giisa sa second alarm sa ala 1:50 sa hapon hinungdan sa pagtubag sa mga fire truck sa kabumberohan sa silingang mga lungsod sa Sibonga ug Dalaguete.
Sa pag-isa sa third alarm sa ala 1:57 sa hapon, nitabang na ang kabumberohan gikan sa Carcar City ug lungsod sa Boljoon.
Nakontrolar ang sunog sa alas 3:44 sa hapon ug na fire out sa alas 6:01 sa gabii sa samang adlaw.
Atol ning pagsuwat, ang kabumberohan nagpadayon pa sa ilang imbestigasyon sa hinungdan sa sunog.
Si Custodio nipahimangno sa katawhan nga magmatngon kanunay tungod sa kainit sa panahon nga risgo sa mga sunog.
Dugang ni Custodio, ang nasod nag-oberbar sa Fire Prevention Month ning pagsugod sa buwan sa ting-init. / DVG