GIKASUHAN sa Ombudsman ang 11 ka mga barangay officials sa Barangay Saavedra, Lungsod sa Moalboal tungod sa giingong peke nga procurement process sa day care center.
Ang maong mga indibiduwal gireklamo og kasong criminal ug administratiba gumikan sa giingong kalapasan sa balaod batok anti-graft, procurement, ug grave misconduct.
Base sa imbestigasyon nga gipangulohan sa National Bureau of Investigation (NBI) Central Visayas Regional Office pinasubay sa mando ni retired court judge Jaime Santiago, ang direktor sa NBI, girekomandar ang pagpasaka og kaso batok sa mosunod nga mga opisyal: Mario Maribao Temblor, barangay chairman; Jay Buagas Diaz, BBAC chairman; Marifel S. Abalorio, BBAC vice-chairman; Annie Laurie I. Benitez, BBAC member/secretary; Edgar P. Bajao, BBAC member; Fidel B. Abrenica, BBAC vice-chairman; Ana Rose Temblor, member, Technical Working Group; Miraflor G. Cutanda, former barangay treasurer; Gershon O. Mena, owner, Sibalom Glass, Aluminum, Construction Supply and Services; Rudy D. Ng, co-owner, Sibalom; Charlie S. Tan, partner, Sibalom.
Ang mga reklamo gipasaka nila ni Elma Nuevo Gabunada ug Josie Alvarico Calipayan, molupyo sa maong lugar.
Subay sa pakisusi, nasayran nga nagsugod ang insidente sa Hulyo hangtod sa Nobiyembre 2024 sa naasoy’ng barangay.
Giingong gi-schedule ang "public bidding" sa Hulyo 26, 2024, alang sa rehabilitasyon sa day care center ug ang pre-bidding conference alang sa mini dump truck. Gipahibalo ang maong bidding pinaagi sa Philippine Government Electronic Procurement System (PHILGEPS).
Apan sukwahi sa aktuwal nga panghitabo, nasayran nga walay quorum nga nahitabo sa maong bidding sanglit usa lang ka bidder ang nitambong nga mao ang Sibalom Glass, Aluminum Construction Supply and Services.
Imbes nga i-reschedule ang bidding process, giingong ni-deliver na sa services ug materyales alang sa rehabilitasyon ang bidder sa Hulyo 28, 2024, diin nagsugod ang rehabilitasyon pagka Agusto 1, 2024, bisan kon dili pa pormal nga na-award ang proyekto.
Nakumpleto ang rehabilitasyon sa ikaduha'ng semana sa Septiyembre 2024, apan subay sa pagsusi, giingong gi-peke ang proseso sa bidding.
Makita sa dokumento nga gi-release ang Notice to Proceed sa Oktubre 30, 2024, samtang ang Certificate of Completion niini adunay petsa nga Nobiyembre 1, 2024, ug ang Inspection Report ug Certificate of Acceptance niini sa Nobiyembre 14.
Gibayran na sab ang kon-traktor og moabot P280,639.01 sa Nobiyembre 20. Lakip sa giimbestigahan mao ang posibleng relasyon sa Barangay Chairman ug mga representante sa bidder isip managhigala human sila nitambong sa adlaw’ng natawhan sa nahisgutan niadtong Hulyo 2, 2024, duha ka semana sa wala pa ang bidding.
Sa gihimong imbestigasyon sa NBI, giingong nakalapas ang mga opisyal sa Republic Act 3019 - Anti-Graft and Corrupt Practices Act, Republic Act 9184 - Government Procurement Reform Act, Republic Act 6713 - Code of Conduct and Ethical Standards for Public Officials ug Employees (Grave Misconduct).
Kon ugaling mapamatud-an nga sad-an, mahimong mahatagan sila og silot sa pagkapriso sulod sa usa hangtod sa 15 ka tuig, pagdili sa paghupot og bisan unsa nga posisyon sa gobiyerno hangtod sa hangtod, pagkumpiska sa mga nadawat nga ilegal nga benepisyo ug permanenteng diskwalipikasyon sa mga pribadong indibiduwal nga nakigtambayayong. / ANV