114% pagsaka sa mga aksidente sa 2 ka buwan

114% pagsaka sa mga aksidente sa 2 ka buwan
Photo from TEAM

Ang Traffic Enforcement Agency of Mandaue (Team) nitaho og dakong pagsaka ngadto sa 114 porsiyento sa ihap sa mga aksidente sa kadalanan sulod sa unang duha ka buwan sa 2024 kon itandi sa samang panahon niadtong 2023.

Samtang 787 ra ka aksidente ang natala sa Team gikan sa Enero hangtod Pebrero 2023, adunay kinatibuk-an nga 1,683 ka insidente ang na-report karong tuiga sa parehas nga panahon.

Ang mga motorsiklo nasuta nga maoy hinungdan sa 41 porsiyento o gibana-bana nga 690 niini nga mga aksidente, gisundan sa mga SUV (14 porsiyento o 236 ka insidente), sedan (10 porsiyento o 163 ka insidente), taxi (unom ka porsiyento o 99 ka insidente), ug pick-up trucks (lima ka porsyento o 92 ka insidente).

Mokabat sa 15 porsyento o 261 ka insidente ang nasulbad sa maayong paagi.

Tali sa Enero ug Pebrero 2024, ang Team nakatala og upat ka kamatayon ug 457 ka angol, menor ug seryoso, nga resulta sa mga insidente sa dalan.

MGA PAGLAPAS

Si Hyll Retuya, Team assistant department head, niingon nga ilang gihingusgan ang checkpoint operations aron masikop ang mga masalaypong motorista nga padayong naglapas sa balaod sa trapiko, nga maoy kasagarang hinungdan sa mga insidente sa kadalanan.

Si Retuya niingon nga ang nag-counterflow nga mga sakyanan maoy usa sa mga nag-unang hinungdan sa mga insidente sa kadalanan. / HIC

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph