DUNAY 12 ka Executive Orders ang pasiunang gipirmahan ni Cebu Governor Pamela ‘Pam’ Baricuatro atol sa unang adlaw sa iyang paglingkod sa katungdanan sa kapitolyo sa Hunyo 30, 2025.
Nag-una sa gilagdaang mando ang hinanali nga pag-release sa pundo alang sa inisyal nga mga panginahanglanon sa mga ospital sa Lalawigan sa Sugbo.
Una nang nasayran nga ang pag-atiman sa mga tambalanan maoy usa sa mga prayoridad nga programa ni Baricuatro sa iyang pamunoan.
Ang Probinsiya sa Sugbo dunay 16 ka mga ospital nga gilangkuban sa upat ka mga provincial ug 12 ka mga district hospitals.
Ikaduha mao ang pag-umol og sab sa Provincial Health Board sa lalawigan sulod sa tulo ka tuig.
Kini pag-establisar sa mga tawo nga mahimong motutok sa kahimtang sa mga ospital ug panglawas sa mga Sugbaonon aron masiguro nga transparent ang pagsugod sa administrasyon.
Gimando sab ni Baricuatro ang pagpatuman sa freedom of information sa Lalawigan sa Sugbo, aron pag-promote sab sa accountability sa tanang opisyal ug mga empleyado sa pagserbisyo niini sa publiko.
Lakip sa gimando ang pagtukod og task force nga maoy motutok sa pagsubay ug pagsulbad sa mga concern sa nagpadayong diskusyon sa mga luna sa 93-1 ug uban pang mga luna nga gipanag-iya sa kapitolyo.
Samtang pagsiguro nga dunay kadangpan ang mga Sugboanon sa ilang mga yangungo, giumol sab ang Cebu People’s Action Center.
Nalakip sa uban pang mga lagda nga gipirmahan ni Baricuatro ang mga mosunod: pagpalihok sa Cebu Provincial investment and promotions division, pag-re-constitute sa bids and awards committee, pagtukod og special review committee; pag-umol sa Cebu Provincial Youth Commission ug pagtudlo og mga miyembro; pag- re-constitute sa Cebu Provincial School Board alang sa 2025-2028 ug pag-umol sa center for participatory governance unit. / ANV