Pito ka mga balay ang naugdaw ug lima ang nakan-an sa kayo sa sunog nga niigo sa Sityo Ulap, Brgy. Basak Pardo, siyudad sa Sugbo, alas 9:30 sa gabii, Martes, Marso 5, 2024.
Sumala sa Cebu City Fire Office (CCFO), gibana-bana ang danyos sa sunog nga moabot og P2.4 milyunes ug ang balay ni Araceli Batino maoy gigikanan sa kayo.
Matod ni Barangay Kapitan Dave Tumulak sa iyang social media post, mokabat sa 18 ka mga pamilya o 89 ka mga tawo ang apektado sa katalagman.
Ang sunog gisaka sa kabomberuhan sa 1st alarm sa alas 9:36 sa gabii ug nakontrolar sa pagka alas 10:07 sa gabii samtang gideklarar nga fire out sa alas 10:17 sa gabii.
Si FO2 Marie Grace D Ambayan, fire investigator sa CCFO, nagkanayon nga nagpahigayon pa sila og imbestigasyon sa sunog atol ning pagsuwat. / DVG