Ang Metropolitan Cebu Water District (MCWD) niila sa 12 ka mga barangay sa mga dakbayan sa Sugbo, Talisay ug Mandaue nga “grabeng apektado” sa kanihit sa suplay sa tubig sa padayong pagtidlom sa inadlaw-adlaw nga produksiyon.
Kini mao ang mga Barangay Umapad, Opao, Alang-alang, Looc ug Subangdaku sa dakbayan sa Mandaue; Lorega San Miguel, Binaliw, San Jose, Talamban ug Pit-os sa Cebu City; ug Cansojong ug San Roque sa Talisay City.
Bisan pa, ang mga residente sa ubang mga barangay nga wala maapil sa lista naglisud usab sa ilang suplay sa tubig, nga adunay usa ka konsumedor nga nitaho nga dili managsama ang serbisyo sukad kaniadtong Enero.
Nahitabo kini samtang nag-atubang ang Sugbo sa dili maayong epekto sa huwaw tungod sa El Niño phenomenon, diin ang epekto niini gilaumang magpadayon hangtod sa katapusan sa Mayo.
Ang tigpamaba sa MCWD nga si Minerva Gerodias nitug-an sa SunStar Cebu niadtong Huwebes, Abril 11, 2024, nga padayon silang nag-atubang og pakigbisog sa paghatag og suplay sa tubig tungod kay mius-os ang produksiyon niini, nga adunay pagkunhod nga 46,748 cubic meters sa tubig kada adlaw.
Ang adlaw-adlaw nga output sa local water utility anaa na lang sa 254,252 cubic meters sugod sa Miyerkules, Abril 10, nga nagpasabot sa 15.53 porsyento nga pagkunhod gikan sa maximum nga kapasidad sa produksiyon sa utility.
Siya niingon nga ang maximum water production capacity ubos sa normal nga mga sirkumstansya kay 301,000 cubic meters kada adlaw.
Ang MCWD nagserbisyo sa mga dakbayan sa Sugbo, Mandaue, Talisay ug Lapu-Lapu, ug mga lungsod sa Consolacion, Liloan, Compostela ug Cordova.
Niadtong Marso 5, si Tommy Gonzalez sa production department sa MCWD nitaho nga nawad-an na sila og 25,000 cubic meters gikan sa ilang inadlaw-adlaw nga produksiyon sa tubig, niadtong panahon nga ang Sugbo gipaubos pa sa dry season.
Sa pagkakaron, gi-report ni Gerodias nga katunga na lang ang sa produksiyon sa Jaclupan wellfield sa Talisay City ngadto sa 14,193 cubic meters matag adlaw, gikan sa naandan nga 30,000 cubic meters, ug sa Buhisan Dam sa 3,143 cubic meters matag adlaw gikan sa 6,000 cubic meters.
Ang produksyon sa tubig sa Lusaran Hydro sa dakbayan sa Sugbo naputol usab sa katunga ngadto sa 15,000 gikan sa 30,000 cubic meters kada adlaw.
Ang suplay lang sa tubig gikan sa Luyang River sa lungsod sa Carmen ang wala maapektuhi.
Ang nagpadayon nga hulaw nakababag pag-ayo sa katakus sa utility nga matubag ang pagtaas sa panginahanglan sa tubig sa komunidad.
Matod pa ni Gerodias nga sa kakuwang karon sa ilang inadlaw nga produksiyon sa tubig, gibana-bana nga 46,000 ka mga panimalay ang makasinati og kagamay sa supply ngadto sa intermittent water supply. / KJF