Moabot sa 12 ka mga General Practitioners (GP) ang gipailaila ni Cebu Governor Pamela Baricuatro isip bag-ong mga hired nga mga doktor nga i-deploy sa walo ka mga hospital sa Lalawigan sa Sugbo sa Miyerkules, Agusto 6, 2025.
Sila kabahin sa pasiunang batch sa mga doktor nga maoy moabag sa mga hospitals sa kalungsoran.
Ang maong mga hospital maglakip sa Argao, Barili, Daanbantayan, Danao City, Carcar City, Minglanilla, Tuburan, ug Sogod.
Si Dr. Nikki Catalan, Provincial Health consultant nipasabot nga ang pasiunang napili nga hospitals nagdepende sa assessment sa Department of Health ug sa gipili niining lungsod nga gustong serbisyuhan.
Kahinumdoman nga sa kinatibuk-an adunay moabot sa 78 ka mga doktor ang gikinahanglan sa kapitolyo alang sa mga hospital sa probinsiya aron matubag ang kakuwangon sa mga personnel.
Ang mga na-hired nga mga doktor mahimo nga mohatag og primary care alang sa mga pasyente sa tanang edad. / ANV