Dose ka mga indibiduwal ang nakaangkon og mga samad human magbangga ang usa ka public utility vehicle (PUJ) ug usa ka auto sa M.L. Quezon National Highway duol sa tiilan sa Marcelo Fernan Bridge sa Barangay Pusok niadtong Sabado sa gabii, Agusto 2, 2025.
Gikumpirma ni Lapu-Lapu City Police Office (LCPO) spokesperson Lt. Col. Christian Torres sa usa ka media interview nga 11 ang nailhan nga mga pasahero ug drayber sa PUJ.
Lakip sa mga naangol mao ang upat ka bata nga nag-edad og duha, tulo, pito ug siyam kinsa daling gidala sa Lapu-Lapu City District Hospital.
Matod niya nga posible sab nga nabali ang abaga sa babaye nga nagpangedaron og 60 apan gipaabot pa ang resulta sa X-ray niini.
Nahitabo ang insidente human ang sedan nga gimaneho sa usa ka 29-anyos nga seaman nisikit sa PUJ nga paingon sa Barangay Mactan.
Matod ni Torres nga ang drayber sa sedan nangangkon nga niliko siya aron malikayan ang usa ka motorsiklo sa unahan, hinungdan nga nitipas sa lane sa multicab kansang drayber nawad-an og kontrol ug natumba duol sa gutter.
Matod ni Torres nga nahitabo ang disgrasya alas 7:01 sa gabii apan gitaho kini sa ilang butahan pagka alas 8:10 sa gabii diin ang duha ka sakyanan nakaangkon og dakong kadaot. Sa Agusto 4, ang abogado sa drayber sa sedan nangandam alang sa posibleng settlement. / DPC