Kapin sa 120 ka mga trabahante sa tulo ka kompanya sa Mactan Economic Zone (MEZ) sa Dakbayan sa Lapu-Lapu ang nawad-an og trabaho.
Si City Public Employment and Service Office (Peso) head Kim Francisco mikompirmar sa phone interview sa SunStar Cebu niadtong Sabado, Abril 12, 2025, nga adunay kinatibuk-ang 126 ka mga trabahante gikan sa tulo ka MEZ companies ang gipang-retrench.
Sa 126 ka mga empleyado, 55 kanila gikan sa usa ka renewable energy firm, 51 gikan sa semiconductor company, ug 20 gikan sa Japanese-owned fashion accessories manufacturer.
Ang retrenchment sa duha ka kompanya gipahibalo sa sayo pa sa Marso, samtang ang usa gi-report kaniadto lang Martes, Abril 8.
“This time around, it was the management who directly informed us. No workers personally came to our office to report. So far, there have been no complaints,” matod ni Francisco.
Gibutyag niya nga ang kompanya sa renewable energy mihunong sa operasyon kaniadtong Abril 2024, apan opisyal ra nga gipahibalo ang ilang buhatan pagka-sunod tuig, samtang ang tiggama sa fashion glove hingpit nga nagsira karon’g bulana.
Gidugang niya nga kini ang una nga gitaho sa 2025 nga naglambigit sa kompanya sa fashion accessory ug semiconductor.
Samtang ang semiconductor company nag-operate pa, gipili niini nga magtangtang og mga empleyado tungod sa pagkunhod sa gidaghanon sa order.
Si Trend Francisco, kanhi manager sa Human Resource sa economic zone, miingon nga ang retrenchment ug redundancy usa ka "normal practice" sa MEZ.
Gipasangil niya nga adunay mga produkto nga seasonal, hinungdan sa pag-usab-usab sa mga trabahante.
“Usually, it’s a common practice to reduce the workforce in their company. We have what we call low season and peak season in manufacturing,” miingon si Francisco.
Alang sa interbensyon sa Peso, ang opisina mo-endorso sa 126 ka mga apektadu’ng trabahante ngadto sa Department of Social Welfare and Development alang sa financial assistance ug sa Department of Labor and Employment alang sa livelihood assistance. / DPC