Gibana-bana sa kapulisan sa dakbayan sa Sugbo nga moabot sa 1.1 ngadto sa 1.2 ka milyon ka mga deboto’ng Katoliko ang ningsalmot sa Solemn Foot Procession nga nagsugod sa ala 1 sa Sabado sa hapon, Enero 20, 2024.
Apan ang mao nga gidaghanon mas gamay itandi sa 3 milyunes sa miaging tuig dihang mas taas pa ang hulga sa Covid-19.
Matod ni Police Lieutenant Colonel Janette Rafter, deputy city director for operations sa Cebu City Police Office (CCPO), nga ang usa sa ilang gitan-aw nga rason mao ang kadaghan sa mga tawo nga naa lang sa ilang tagsa-tagsa ka balay nag-atang lang nga moagi ang imahen ni Sr. Santo Niño, ilabi na sa dan Urgello sa Brgy. Sambag 1.
Wala mokuyog ang uban tungod kay niagi na sa residential area ang procession.
“Niagi man gud siya sa residential area mao na nga ang mga tawo nagpaabot na lang sa ilang mga balay nga moagi ang image sa Balaang Bata,” matod ni Rafter.
Apan bisan pa niini, matod ni Rafter nga daghan pa gihapon ang 1.2 ka milyon ka mga tawo nga bisan sa kainit sa panahan wala nila baliha.
KAINIT
Way natala nga krimen sa matag sector gawas lang sa daghan ang nangalipong tungod sa kainit, ilabi na kadtong mga edaran na.
Duna hinuoy mga medical station nga nakalibot sa rota sa procession nga daling maduolan kon dunay malipong o makuyapan.
Hapsay ug malinawon nga natapos ang kalihukan tungod sa kadaghan sa mga polis nga gipakatap sa rota. Moabot sa dul-an usa ka libo ka mga polis, wa pay labot niini ang mga tinun-an ug force multipliers.