Patay ang 13 anyos nga lalaki human gipusil sulod sa tulo ka higayon sa duha ka mamumuno sa alas 10:30 sa gabii, Lunes, Oktubre 28, 2024 sa Sitio Lahing-Lahing 2, Barangay Mabolo, Dakbayan sa Sugbo.
Ang biktima giila nga si Kenjie de Jesus, residente sa maong lugar ang nakaangkon og mga samad pinusilan sa suwang, dughan ug likod nga bahin.
Sigon pa sa usa ka saksi nga nagdumili sa pagpaila nga duha ka lalaki nga pulos naka-bonnet ang mipusil sa biktima ug human nahagba giusban pa kini sa pagpusil sa bukobuko nga bahin hangtod nga nakabsan sa iyang kinabuhi.
Sa imbestigasyon sa Mabolo Police Station nga nigawas ang biktima sa ilang balay ug wa madugay tulo ka buto sa armas ang nadungog sa mga residente.
Si Juvenile Arogante Nolia, 46, panday ug kasamtangan nga nagpuyo sa balay ni Lagresa Menesis nga iyang gipanday mibutyag sa mga imbestigador nga sa dihang padulong na siya nga matulog kalit lang nga dunay buto sa armas nga iyang nadungog.
Sa iyang pagsusi sa gawas iyang nakita ang biktima nga nagbuy-od na nga duna nay mga samad pinusilan sa lawas ug wala na maglihok.
Sa paghiling sa mga sakop sa Scene of the Crime Operation nakakuha sila og tulo ka basiyo sa wala pa matino nga kalibre sa armas sa dapit ug 13 ka pakete sa gituohang shabu diha sa bulsa sa biktima.
Matod ni Police Major Romeo Caacoy Jr., hepe sa Mabolo Police Station nga padayon pa nilang gisubay ang mga suspetsado nga way kaluoy nga mipatay sa menor de edad.
Drugas ang usa sa ilang gitan-aw tungod kay nakadawat na sila og impormasyon nga ang maong batan-on nalambigit sa pagpamaligya sa ilegal nga drugas.
“Subayunon pa na namo either wala ka remit kay didto sa crime scene naa man mi nakuha nga drugas pud,” matod ni Caacoy.
DUGAY NANG NALAMBIGIT
Ang inahan sa biktima miangkon usab nga nalambigit sa ilegal drugs ang iyang anak.
Matod sa inahan nga bugtong niyang anak si Kenjie ug nasayod siya nga nalambigit sa illegal drugs ang iyang anak sukad pa nga nag-edad og 9 anyos apan bisan sa iyang pagbadlong ug pahimangno gahi og ulo ug dili mopatuo ang biktima.
Sumala pa nga gipaeskuwela niya ang iyang anak sa Mabolo Elementary School apan matingala siya nga mokalit kinig uli sa ilang balay.
Nagdumili na siya sa paghatag sa dugang detalye labot sa kalambigitan sa ilegal nga drugas sa iyang anak tungod kay nahadlok kini nga siya na usab ang patyon sa mga suspetsado.
“Kabalo ko ana sir pero dili lang ko mosulti kay ako na sad ang isunod sa pagpatay,” matod sa inahan sa biktima.
Magsaulog unta sa iyang adlaw nga natawhan karong adlawa Oktubre 30, 2024 si Kenjie sa edad nga 14, gani nihatag ni niya og P500 aron magpaluto og spaghetti ug mango float.
Wala na makurat pa si Caacoy nga nagkabata na ang nalambigit sa ilegal nga drugas sanglit mao kini ang gihimo sa mga durugista tungod kay dili man kini mapasakaan og kaso sa korte. /AYB