Na-rescue sa kapulisan sa Siyudad sa Sugbo ang 134 ka mga menor atol sa unom ka adlaw nga Oplan Bulabog nga gisugdan sa Hunyo 16-22, 2025.
Kapin sa usa ka gatos ka mga police personnel sa Cebu City Police Office (CCPO) ang gipakatap uban sa local government unit ug lainlaing force multipliers aron molusad sa Oplan Bulabog ug Oplan Bakal-sita.
Ubos sa pagdumala ni Police Colonel Enrico Figueroa, ang hepe sa kapulisan sa Dakbayan sa Sugbo, ug pakig-alayon sa Police Regional Office (PRO) 7 uban sa tanang police stations ug special unit sa CCPO ilang gipatuman ang tanang ordinansa aron pagpugong sa krimen.
Atol sa operation naka-inspection ang kapulisan ug mga personnel sa kagamhanan sa Siyudad sa Sugbo og 2,308 ka establisamento ug pag-rescue sa 134 ka mga menor nga nakalapas sa ordinansa sa curfew.
Nakaisyu sab sila og citation ticket sa 12 ka tawo nga nasakpan nga nanabako sa publikong lugar, nangihi sa kilid sa karsada, ug uban pa nga kalapasan.
Samtang nadakpan sab sa kapulisan ang usa ka 39-anyos nga lalaki nga taga Barangay Suba, Siyudad sa Sugbo human makuhaan og mga pinutos sa gituohang shabu nga mobalor og P12,600.
Pasalig sa kapulisan nga magpadayon ang operasyon hangtod nga madakpan ang mga badlungon sa katilingban. / AYB