14 anyos gihimong ‘runner’ sa illegal drugs, naluwas

Cebu City map.
Cebu City map.

Malampuson nga naluwas sa mga sakop sa Carbon Police Station ang 14 anyos nga batang lalaki nga gihimong runner sa illegal nga drugas uban sa barangay officials sa Ermita, dakbayan sa Sugbo niadtong Dominggo sa gabii, Disyember 17, 2023.

Ang maong menor de edad nakuhaan pa og 11 ka pakete sa gituohang shabu.

Ang kapulisan sa Carbon nakadawat og tawag gikan sa concerned citizen labot sa paggamit sa mga bata nga gihimong runner sa illegal nga drugas sa Ermita Proper.

Dali nga nakig-alayon ang Carbon Police pinaagi sa Women and Children Protection Desk (WCPD) ngadto sa Barangay Ermita officials ubos sa supervision ni Police Captain Jade Basingao ug ilang naluwas ang maong batang lalaki.

Kasamtangan nga anaa sa kustodiya sa Carbon Police Station ang maong bata ug duna kini gihatag nga kasayuran kon si kinsa ang nagsugo kaniya sa pag-dispose sa ma­ong illegal nga drugas.

GINIKANAN IPATAWAG

Si Police Staff Sergeant Marissa Manubag sa WCPD sa Carbon nagkanayon nga gipaubos sà stress debriefing ang bata.

Iyang gibutyag nga kompleto pa sa ginikanan ang maong bata diin ang amahan niini usa ka kargador sa Carbon Market.

Gipatawag na sa barangay ang mga ginikanan sa bata ug dinhi masuta kon duna ba silay tulubagon sa ilang mga anak.

Giangkon ni Manubag nga usa ka alarming ang nahitabo sa maong bata nga angayang hatagan sa dinalian nga pagtagad.

“Yes, alarming gyud na dapat ato nang mahatagan og importansya ug action apan kami sa PNP ang among gihimo sa pagkakaron ang safety ug security sa bata ang among concern,” matod ni Manubag.

Lakip sa ilang ipaubos sa debriefing ang mga ginikanan sa maong bata nga molupyo ra usab sa maong barangay.

Dili na kini bag-o sa kapulisan sanglit aduna usab kini insidente sa Barangay Lorega sa nanglabay nga katuigan diin ang napalitan sa buy-bust operation usa ka bata.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph