Nahigmata ang 14 anyos nga dalagita tungod sa gibati'ng kasakit ug nakurat dihang nakita nga ang duha ka mga tudlo sa iyang higala nga 17 anyos nga lalaki, diha sa iyang kinatawo.
Ang insidente nahitabo sa Brgy. Calaboon, lungsod sa Dumanjug, habagatan sa Sugbo, pasado alas 8:00 sa kagabhion, Huwebes, Agusto 8, 2024.
Ang suspek si alyas Caloy, nagpuyo sa kasikbit nga barangay, nadakpan sa barangay tanod ug gi-turnover sa kapulisan sa pagkas alas 10:50 sa gabii sa samang adlaw.
Ang biktima si alyas Chloe, nagping-it sa kasakit sa bugan dihang nangayo'g panabang sa tanod.
Si Police Staff Sgt. Vilma Caballeros, hepe sa Women's and Children Protection Desk (WCPD) sa Dumanjug Police Station nga nahinabi sa Superbalita Cebu, nagkanayon nga karong adlawa, Lunes, Agusto 12, 2024, ilang ipasaka ang kasong lugos.
Gipaabot na lang sa kapulisan ang resulta sa eksaminasyon sa Pink Room sa Vicente Sotto Memorial Medical Center (VSMMC).
Matod ni Caballeros, gitawagan na lang sila sa mga tanod sa nahisgutang barangay kabahin sa usa ka batan-ong gihilabtan sa laing menor.
Sa pag-abot nila sa lugar, nasuta gyud nila nga nahilabtan ang biktima.
Dali nila kini nga gidala sa tambalanan nga gi-refer sab VSMMC aron mahiling sa Pink room.
Si Caloy gidala sa Dumanjug Police Station ug gibalhin sa Department of Social Welfare and Development (DSWD).
Sumala ni PSSGT Caballeros, si Chloe natulog siya sa payag niadtong higayuna uban sa iyang higala nga silingan nga uyab sa suspek.
Apan niuna sa pagpauli ang iyang higala hinungdan nga siya na lang ug ang suspek nga uyab sa iyang higala.
Wala siya magdahom nga gikumot-kumot ang iyang dughan.
"Nakamata na lang daw siya dihang gipasok aning suspek ang duha ka tudlo," matod sa polis subay sa asoy sa biktima.
Sa kahadlok sa biktima, nidagan kini palayo sa lugar ug nangayo siya og panabang sa tanod nga silingan ug nasikop si Caloy.
Ang biktima niingon nga nanuroy sila sa iyang higala sa maong dapit ug nikuyog nila ang suspek nga uyab sa iyang higala.
Apan wala siya magtuo nga buhatan siya sa ingon, dason sa biktima ngadto sa kapulisan, sanglit nisalig siya niini isip usa ka higala ug suod sab sa uyab.
Matod ni Caballeros, ang suspek niangkon sa iyang nabuhat.
"Natintal kuno siya, wala makapugong nga nagsud-ong kang Chloe ug iyang nahilabtan," sumala ni Caballeros. (GPL)