Nalandig sa tambalanan ang usa ka 14 anyos nga batang lalaki sa dihang gipusil sa ka security guard sa compound sa usa ka beach resort sa Barangay Poblacion, lungsod sa Cordova, alas 10 sa buntag, Sabado, Disyembre 7, 2024.
Ang biktima taga Purok 5, Barangay Catarman, Cordova samtang ang suspek nga security guard giila nga si Veronico Benjame, hamtong ang panuigon, ug taga Barangay Tisa, siyudad sa Sugbo.
Sa pakisusi sa Superbalita Cebu, nasayran sa imbestigasyon sa kapulisan sa Cordova ubos sa kamanduan sa ilang hepe nga si P/Maj. Joffrey Grande nga ang biktima kuyog sa laing duha ka mga barkada ang nisud sa compound sa resort ug nakit-an sa security guard nga nanagan ug nikatkat sa konkretong koral aron paggawas.
Sumala sa biktima, ilang nadunggan ang sipang buto ug ang biktima naigo sa kilid sa iyang lawas apan nakauli sa ilang balay nga wa mosumbong sa iyang inahan bahin sa nahitabo.
Apan ang maguwang nga lalaki mao ang nakatug-an ngadto sa ilang inahan hinungdan nga ang bata daling gidala sa tambalanan ug dayong nisumbong sa kapulisan sa Cordova.
Sa gipahigayong pagsubay sa kapulisan, off na ang suspek nga security guard ug lain na ang naka-duty, kinsa maoy ni-turn over sa 9mm pistol nga may magazine nga may tulo ka mga bala nga maoy gigamit sa pagpusil ngadto sa biktima nga gibilin na didto sa ilang guard house.
Atol ning pagsuwat, ang kapulisan nagpadayon pa sa ilang imbestigasyon sa kaso. / DVG