14 ka baktin ‘gibalbal’?

14 ka baktin ‘gibalbal’?

Nagubot ang mga lumolupyo sa Brgy. Mantalongon, lungsod sa Barili, kasadpang habagatang Sugbo human hikaplagi nga patay na ang tanang 14 ka mga baktin sa Sabado sa kaadlawon, Enero 6.

Ang mga baktin giingong dunay mga pinaakan sa liog agi sa duha ka mga ngipon ug giingong wa nay dugo ug wa sab kini giingong makaagas.

Base sa exclusive interview sa telepuno sa Superbalita Cebu kang Bernard Capacite, 57, ang mga baktin iya sa iyang iyaan nga si Letecia Pabroa.

Ang alad sa mga baboy naa ra kilid sa balay sa iyang iyaan.

Matod niya nga ang iyang iyaan wa sa balay niadtong Biyernes sa gabii kay nangadto sa dakbayan sa Carcar uban sa bana niini.

Matod ni Capacite nga katapusan niyang namatikdan ang mga baktin nga buhi pa mga alas 2 sa kaadlawon Enero 6, kay iyang gipatutoy sa anay.

Pagka alas 3 na sa kaadlawon nigawas siya sa balay aron sa paglung-ag, iyang nakaplagan ang mga baktin nga diha na sa gawas sa alad nga pulos na patay.

Iyang nakita ang mga pinaakan sa kalawasan niini, apil na sa liog ug tiyan.

Nagduda si Capacite nga iro ang nibalbal sa 14 ka mga baktin kay masud ra ang alad kay mubo ra ang koral niini.

Apan si Paping Lariosa, silingan nga nakakita sa kahimtang sa mga baktin, di motuo nga ordinaryong iro ang nipatay sa mga baktin kay ang pinaakan upat unta ka mga samad nga mag-atbang gumikan sa upat ka mga tango sa iro.

Ang samad sa mga baktin kay lawom nga tuldok ra ug nahubsan og dugo nga hayan gisuyop.

Alang kaniya misteryuso ang nahitabo, apan di siya makaingon nga sigbin ang naghimo niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph