Moabot ngadto sa 14 ka bag-ong police patrol cars ang gi-turnover sa Police Regional Office (PRO 7) ngadto sa 14 ka municipal police stations sa probinsya sa Sugbo nga gipahigayon sa Cebu Police Provincial Office (CCPO) headquarters.
Nakadawat sa bag-ong mga sakyanan mao ang police stations sa Tabogon, Balamban, Dalaguete, Boljoon, Cordova, Tudela, San Remegio, Tabuelan, Medellin, Borbon, Ginatilan, Malabuyoc, Moalboal, ug Ronda.
Ang maong mga sakyanan gikan sa Camp Crame, diin ang PRO 7 na ang nipili kon asa nga police station ang hatagan base sa kasamtangan nga kakuwangon sa kagamitan niini.
Nitambong sa kalihukan ang mga chief of police sa police stations nga nakadawat og bag-ong patrol cars, lakip na sab ang mga mayor ug konsehal.
Ang hepe sa PRO 7 Police Brigadier General Anthony Aberin nga maoy nangulo sa pag-turnover sa mga sakyanan nagkanayon nga ang paghatag sa brand new nga patrol cars nagpakita sa kamatinud-anon sa Philippine National Police (PNP) sa pagserbisyo sa publiko.
DI MAGBINUANG
Giawhag ni Aberin ang mga nakadawat sa maong mga sakyanan nga gamiton kini pinaagi sa paghatag og paspas nga pagtubag sa mga nanginahanglan.
Iya usab nga gipahinumdoman ang police personnel nga atimanon ang mga sakyanan sama sa saktong maintenance aron molungtad og dugay ug dili sab gamiton sa personal nga lakaw.
“Walang nag magmaneho ng lasing, wag nating ipapamaneho sa mga kasama nating polis na hindi naka lisensyado at hindi marunong magmaneho. Dapat yung nag mamaneho dito ay marunong magmaneho,” matod ni Aberin.
Sa wala pa kini ipang-apod-apod sa 14 ka police stations, gipanalanginan una kini ni Police Lieutenant Colonel Joselito Borja, chaplain sa PRO 7.