Di mominos 14 ka mga kaso sa rabies ang natala sa Dakbayan sa Sugbo sa ikaduhang quarter sa 2024, tulo na lang ka mga kaso ang kulang sa 17 ka mga kaso sa rabies nga natala sa kinatibuk-an sa 2023.
Ang natala nga mga kaso nakapabalaka sa mga beterinaryo sa siyudad, kay gikonsiderar kini nga “makapaalarma” tungod kay gamay na lang ang kulang molabaw na sa gidaghanon sa mga kaso sa 2023.
Sa usa ka pakighinabi sa Miyerkules, Hunyo 5, 2024, si Dr. Alice Utlang, pangulo sa Department of Veterinary Medicine and Fisheries (DVMF) sa dakbayan sa Sugbo, niingon nga “may mga bulan pa sa dili pa ang Disyembre, ug ang datos alang niining tuiga taas na.”
Si Utlang nitaho nga adunay natala nga mga kaso sa rabies sa 11 ka barangay sa dakbayan sa Sugbo, apil na niini ang Lahug, Mabolo, Basak San Nicolas, Tisa, Cogon Pardo, Bulacao, Carreta, Tinago, Barrio Luz, Ermita, ug Zapatera. Bisan pa, wala siya maghatag og tukma nga numero sa matag barangay.
Gisaway ni Utlang ang “irresponsible” nga mga tag-iya og binuhi nga napakyas pagpabakuna sa ilang mga iro ug giawhag ang tanang tag-iya og iro nga pabakunahan ang ilang mga binuhi batok sa rabies aron malikayan ang P2,000 nga silot.
Siya niingon nga ang mga tag-iya mahimo’ng mag-iskedyul og mga pagbakuna pinaagi sa ilang mga representante sa barangay, nga wa na kinahanglana ang pagbisita sa barangay health center.
“Kon mangutana ka kon naa bay bakuna sa iro, ang Cebu City government naa. Ang problema kay sila, mao nga nanawagan ta sa atong mga kaigsoonan kon wala pa sila makapabakuna sa ilang mga iro, tawagan sila sa barangay kay naay mga tawo nga mag house-tohouse para ani,” ni Utlang.
Si Utlang niingon nga kon ang iro magpositibo sa rabies, P5,000 ang silot. / AML