Sulod sa unom ka adlaw nga Oplan Bulabog ug Oplan Bakal Sita sa tibuok 80 ka barangay sa Dakbayan sa Sugbo gikan sa Hunyo 2 ngadto na sa Hunyo 8, 2025, 141 ka menor de edad ang naluwas sa kapulisan inabagan sa nagkalainlaing force multipliers.
Ang maong mga menor gi-turnover sa Cebu City Social Welfare and Services (DSWS) aron ipatawag ang mga ginikanan ug pahimangnuan nga kanunay nga bantayan ang ilang mga anak nga dili na mogawas sa panimalay panahon sa lawom na nga kagabhion hangtod sa kaadlawon.
Tumong ug tuyo sa pagpahugot sa ilang kampanya aron nga magpabilin ang kahusay ug kalinaw sa Dakbayan sa Sugbo ilabi na sa gabii hangtod na sa kaadlawon.
Ubos sa pagdumala ni Police Colonel Enrico Figueroa uban sa pakig-alayon sa Police Regional Office 7 pinaagi sa hepe nga si Police Brigadier General Redrico Maranan, tanang police station ug mga special unit ang nisalmot sa Oplan Bulabog ug gitutokan ang pagpatuman sa tanang ordinansa sa dakbayan.
Sa maong operation naka-inspection ang kapulisan og 2,259 ka establisamento, 20 ka tawo ang naisyuhan og citation tickets sa kalapasan sa pag-inom sa publikong lugar, nangihi sa bisan asa, naghukas, vandalism ug naghugaw-hugaw sa palibot.
Atol sa pagpatuman sa Oplan Bulabog ug Oplan Bakal Sita nakasikop ang Mambaling Police Station og 29 anyos nga lalaki nga nakuhaan og pinakete sa gituohang shabu.
Gihangop ni Maranan ang kalampusan nga nahimo sa kapulisan sa Dakbayan sa Sugbo ug iyang gidayeg tungod sa presensya sa daghang
police personnel sa kadalanan nga makita labi na sa mga high crime areas aron pagsiguro sa kaluwasan sa publiko./ AYB