Patay na nga napalgan sa kadagatan sa Hagnaya Port sa Barangay Hagnaya, Lungsod sa San Remigio ang 15-anyos nga tinun-an alas 7:46 sa buntag, Lunes, Agusto 24, 2026.
Ang biktima giila nga si Mark Salvador Samson, taga Purok Sikwa, Barangay Hagnaya.
Sa imbestigasyon sa Women and Children Protection Desk sa San Remigio Municipal Police Station, ang patay nga lawas sa 15 anyos nakit-an sa usa ka Rodulfo Layague sa rampa sa Hagnaya Port.
Dugang nasayran sa kapulisan base sa pamahayag sa mga kauban sa biktima nga niadtong Dominggo, Agusto 23, 2026, sa alas 9 sa gabii, usa ka apprentice sa M/V Island Venture nga si Cris Eljohn Calixton Dubal, 23, taga Purok 2, Barangay Maitum, Sarangani Province nibutyag kanila nga kon kinsa ang makakita sa iyang selpon nga natagak sa dagat iyang hatagan og reward nga P1,000.
Ang mga menor de edad nangambak sa dagat aron pangitaon ang cellphone apan wala na makatunga pagbalik ang biktima.
Ang mga awtoridad nagpahigayon dayon og search and rescue operation apan wala gyud makit-i ang biktima.
Nakadawat na lang og impormasyon ang kapulisan sa San Remigio nga dunay lawas sa bata ang napalgan sa Hagnaya port.
Ipaubos nila sa autopsy ang patay'ng lawas sa biktima aron masayran kon duna bay foul play ang kamatayon niini. / AYB
