Samtang gihingusgan sa Cebu City Government ang anti-mendicancy policy, ang Department of Social Welfare and Services (DSWS) nakaluwas sa 15 ka Badjao ug gikatakda nga ibalik sa ilang dapit sa Jolo, Sulu.
Si Portia Basmayor, pangulo sa DSWS, nitug-an sa SunStar Cebu sa pakighinabi sa telepono niadtong Dominggo, Disyembre 1, 2024, nga ang 15 ka mga Badjao temporaryong gipasilong sa sentro sa Barangay Mambaling tungod kay gikanselar ang ilang biyahe sa barko.
Matod niya, ang DSWS nanghatag og pagkaon sa mga Badjao nga adunay P38,000 nga budget gikan sa City Government. Dugang niya, lakip sa budget ang pletihan sa bus, barko ug pocket money.
Siya niingon nga ang iyang mga personahe motabang sa 15 ka Badjao nga moadto sa Munisipyo sa Badian, ug gikan didto mosakay sila og barko paingon sa Zamboanga City.
Dugang pa niya nga kon dili sila tabangan sa iyang mga personahe, peligro ang dili hingpit nga pagbalik sa mga Badjao sa ilang lugar sa Sulu.
Matod sa mga Badjao, si Basmayor niingon nga dili sila kahibawo mobasa ug mosuwat. Matod pa nila, ang pagpakilimos maoy ilang panginabuhian.
Sumala ni Basmayor nga nakig-alayon na ang iyang mga personnel sa mga opisyal sa Zamboanga.
Gipasabot niya nga ang 15 ka Badjao gi-turn over gikan sa Badian tungod kay nagtuo ang munisipyo nga sakop sila sa Dakbayan sa Sugbo.
Gidugang niya, ang social worker gikan sa Badian mikontak sa DSWS alang sa pagpauli sa mga Badjao tungod kay gipakusog usab sa ilang munisipyo ang anti-mendicancy efforts.
Sa dihang gitabangan ni Basmayor ang mga Badjao nga makauban ang komunidad sa Badjao sa Barangay Mambaling, dakbayan sa Sugbo, niingon siya nga ang mga komunidad nibalibad sa ilang pagdawat sanglit dili man sila sakop sa mga komunidad.
Ang City Ordinance 1631, o ang Anti-Mendicancy Ordinance, nagdili sa pagpakilimos o paghatag og limos sa kadalanan sa dakbayan sa Sugbo, diin ang mga malapason mobayad og multa nga P1,000 o mohatag og upat ka oras nga community service.
Ang mendicants, sumala sa Ordinansa, nagtumong sa mga tawo nga lig-on og lawas nga way makita ug legal nga paagi sa suporta ug sa baylo naggamit sa pagpakilimos isip paagi sa pagkinabuhi. / JPS