GIBUTYAG ni Justice Secretary Jesus Crispin Remulla niadtong Biyernes, Hulyo 4, 2025, nga ang 15 ka mga polis ang gibutang sa restrictive custody tungod sa giingong kalambigitan sa pagkawala sa mga sabungero nga hangtod karon wala pa makit-i sukad niadtong 2021.
“Restricted duty na sila. They have to report already to offices para doon na sila. Para hindi na sila makasakit,” matod pa ni Remulla.
Sa sayo pa, gipakigtagbuan ni Remulla ang kabanay sa mga na-missing nga sabongero kini human niadtong gibutyag sa akusado nga nahimo nang whistleblower nga si Julie “Dondon” Patidongan, kanhi chief of security sa mga cockpit arena diin gidagit ang mga sabungero.
Apil si Patidongan sa mga unang giakusahan sa pagdagit ug pagkawala ni e-sabong master agent Ricardo Lasco sa San Pablo, Laguna niadtong Agusto 2021. Sa maong kaso, pito ka polis ang gipasakahan og dismissal sa tuig 2022.
Sa iyang mga pamahayag, gitudlo ni Patidongan ang negosyante ug gaming tycoon nga si Charlie “Atong” Ang, tag-iya sa maong mga sabungan, nga maoy mastermind sa giingong pagpatay sa mga sabungero.
Gibulgar sab ni Patidongan nga gihaylo siya ni Ang og P300 milyunes aron nga bakwion ang iyang unang pamahayag nga nitumbok ni Ang sa kaso.
Apan nisang-at og pormal nga reklamo si Ang nga nisumbalik og pasangil nga gi-extort siya si Patidongan og P300M bugti sa pasalig nga dili ilakip ang iyang pangalan sa maong kontrobersiya.
Samtang nipasalig si Remulla ngadto sa pamilya sa mga biktima nga padayon ang ilang imbestigasyon aron makab-ot ang hustisya. / TPM /SunStar Philippines