Gikuwestyon sa Mandaue incoming city administrator ubos ni Mayor-elect Thadeo “Jonkie” Ouano ang paghatag sa 15 ka Toyota Hilux nga sakyanan ngadto sa Sangguniang Kabataan (SK) chairpersons sa 15 ka mga barangay kon kini makiangayon ug legal nga lakang.
Si incoming administrator Sally Malig-on nagkanayon nga bisan nadawat na sa mga SK chairperson ang mga sakyanan niadtong Nobiyembre 8, 2024, alang sa ilang inadlaw-adlaw nga gamit apan ang official deed of donation nakaung-ong pa sa Sangguniang Panlungsod.
Pabilin kining gi-review sa Committee on Laws sa konseho.
Dunay 15 ka new brand nga sakyanan nga mokantidad og P37 milyunes.
“These are brand new vehicles, and in our assessment, the SK is not yet ready or capable of managing such resources. They cannot hire personnel, so who will drive these vehicles? Do they even have the budget for fuel and maintenance?” matod ni Malig-on.
Naobserbahan ni Malig-on nga sa nangagi'ng mga buwan, ang siyudad padayon nga maoy niabaga sa maintenance ug gasolina sa matag sakyanan bisan anaa na kini sa kustodiya sa mga SK chairperson.
Gitataw ni Malig-on nga ang tanang panalapi sa siyudad kinahanglan nga tarungon ug pinasubay sa balaod ug bantayan nga dili kini mausik ug mawariwari sa paggamit.
Matod niya nga ang donasyon makonsiderar nga improper use sa city assets, ilabi na nga ang SK wala pagkatakus nga mo-manage ug mo-maintain og sakyanan.
Ang Sangguniang Panlungsod wa pa motapos sa ilang pagtuki sa gisugyot nga donasyon.
Ang Committee on Laws gituohan nga moluwat og rekomendasyon sa umaabot nga semana.
Matod ni Malig-on nga ang umaabot administrasyon, komitido nga tarungon ang pagdala sa mga kabtangan sa Dakbayan sa Mandaue. /CAV