Ang usa ka P5,000 nga employment grant maoy sinugdanan sa dakong kausaban sa kinabuhi ni Marjun Gestofa, usa ka benepisyaryo sa Sustainable Livelihood Program (SLP) sa Department of Social Welfare and Development (DSWD).
Niadtong 2016, nakadawat si Marjun og tabang gikan sa SLP aron magastusan ang iyang pre-employment expenses alang sa trabaho isip service crew sa usa ka fast food restaurant sa Mactan-Cebu International Airport.
Karon, hapit usa ka dekada ang milabay, assistant unit manager na siya sa maong kompanya ug nakahuman sa Bachelor of Science in Business Administration pinaagi sa Expanded Tertiary Education Equivalency and Accreditation Program (Eteeap).
Ang iyang sugilanon usa lamang sa liboan ka mga kinabuhi nga nausab pinaagi sa SLP nga nagsaulog karon sa ika-15 ka tuig sa paghatag og mga oportunidad alang sa malungtarong panginabuhian sa mga Pilipino.
Gitukod pag-usab sa DSWD ang SLP niadtong 2011 aron mapalig-on ang mga indibidwal, pamilya, ug komunidad pinaagi sa mga oportunidad sa kita ug pagsalig sa kaugalingon.
Ang programa adunay duha ka nag-unang pamaagi: ang Micro-Enterprise Development (MD) alang sa mga gustong magsugod og negosyo ug ang Employment Facilitation (EF) alang sa mga nangita og trabaho.
Sa Central Visayas, daghan na nga komunidad ang nakapahimulos sa maong programa.
Gikan sa gagmay nga mga asosasyon sa mga benepisyaryo, adunay mga grupo nga nahimong malampusong community-based organizations nga karon nagsuplay og mga produkto alang sa Walang Gutom Program ug Supplementary Feeding Program sa DSWD.
Usa sa mga ehemplo niini mao si Jocelyn Hugo, presidente sa Cawayan Sustainable Livelihood Program Beneficiaries Association (CSLPBA) sa Inabanga, Bohol.
Matod niya, nahimong tinubdan sa paglaom ug kalig-on ang maong asosasyon alang sa ilang mga miyembro.
“Padayon kami sa paglaom ug pagpaningkamot, salamat sa kaayuhan nga gihatag sa programa kanamo,” sumala ni Hugo.
Pinaagi sa negosyo sa asosasyon, nakapadayon siya sa pagpaeskwela sa iyang mga anak, nakadawat og bahin sa kita sa grupo, ug nakatukod sa kaugalingong panginabuhian.
Sumala sa DSWD, gikan sa 2011 hangtod Hunyo 30, 2026, nakaserbisyo ang SLP Region VII sa 349,135 ka partisipante ug nakapagawas og P3.996 bilyunes nga livelihood grants.
Niadto lamang tuig 2025 ug 2026 , 9,007 ka benepisyaryo ang nakadawat og product development ug diversification grants nga mokabat sa P68.9 milyunes aron mapalambo ang ilang mga produkto ug negosyo.
Sa mensahe ni Regional Director Shalaine Marie S. Lucero atol sa ika-15 nga anibersaryo sa programa, iyang gipasidunggan ang kalampusan sa SLP tungod sa pokus niini sa paghatag og tinuod nga oportunidad sa merkado alang sa mga benepisyaryo.
“A livelihood becomes truly sustainable not when it starts, but when it remains connected to the market and continues to thrive over time,” matod ni Lucero.
Samtang nagsaulog sa 15 ka tuig nga serbisyo, ang SLP nagpadayon sa paghatag og paglaom ug oportunidad sa mga pamilya ug komunidad.
Sa matag livelihood grant adunay estorya sa pagkamadasigon, ug sa matag kalampusan adunay mas hayag nga kaugmaon alang sa umaabot nga mga henerasyon. / PR