Gimanduan sa kagamhanan ang mga residente sa Barangay Guadalupe, Dakbayan sa Bogo nga mopalayo lang una sa lugar diin nakit-an ang gibana-banang 15-metros nga gilapdon sa sinkhole sa Agusto 21, 2026.
Sa nasayran, adunay tulo ka panimalay nga namuyo duol sa lugar.
Gipahibalo sa kagamhanan nga nipahigayon na og inisyal nga assessment ang mga sakop sa City Disaster Risk Reduction and Management Office (CDRRMO) aron pagsuta sa gikinahanglang safety measures nga ipatuman.
Subay niini, gikordon na ang nahimutangan sa sinkhole ug dili na kini paduolan sa mga residente.
Giawhag sab ang mga residente nga likayan ang paglabay og basura, yuta, bato o bisan unsang debris nga makatandog unya sa maong buho ug aron malikayan sab ang contamination ug obstruction niini.
Aron maseguro ang kaluwasan sa mga namuyo sa dapit, aduna nay mga barangay tanod nga gidestino nga maoy magpuli-puli og bantay sa lugar.
"Bisan pa man nga dili sulod sa 20-metros nga setback, giawhag ang preemptive evacuation isip precautionary measure kay ang safety mao gyud atong prayoridad," saysay sa kagamhanan sa Biyernes, Agusto 21.
Ang maong bakante nga luna diin nahimutang ang sinkhole gipanag-iya ni Nancy Getuaban, 40 anyos.
Ang sinkhole anaa ra sab sa babaw nga dapit sa ilahang balay.
Matod ni Getuaban nga niadtong usang semana lang sila nahuman og hinlo sa luna kay tamnan na nila kini og balik og mga mais, utanon, ug uban nga mga pananom.
Apan namatikdan ni Getuaban nga mga alas 5:00 sa buntag niadtong Huwebes, Agusto 20, dunay nibuto sa maong yuta ug sa iyang pagsusi, nabangag na kini.
“Mga around 5 maam kay langas kaayo akong iro 'nya di gyud sila mohunong og usig. Timing sad nga naa koy giasikaso nga baktin, nibuto siya og balik. Mao to pagtan-aw nako, bangag na siya pero di pa kaayo ingon ani kadako,” matod ni Getuaban.
Duha ka punoan sa lubi og saging na ang gilamoy sa maong sinkhole.
Usa ka teknikal nga grupo gikan sa MGB ang gikatakdang mohimo og on-site nga ebalwasyon karong adlawa, Agusto 22, aron masuta ang tukmang hinungdan, giladmon, gidak-on sa ilawom sa yuta, ug kalig-on sa yuta.
Sumala sa geological information sa Mines and Geosciences Bureau (MGB), ang sinkholes mahimong mahitabo sa mga lugar nga adunay limestone o carbonate rocks, diin ang tubig sa ilawom sa yuta mahimong hinay-hinay nga motunaw sa bato ug makahimo og underground cavities. /ANV, JDG, CDF