Moabot ngadto sa 151 ka mga indibidwal ang nadakpan sa kapulisan sa dakbayan sa Sugbo atol sa lima ka adlaw nga anti-criminality operations gikan sa Marso 27-31, 2024 bisan sa ilang hugot nga seguridad nga gipatuman sa Semana Santa.
Sa kampanya sa ilegal nga drugas, nakasikop ang Cebu City Police Office (CCPO) og 21 ka mga drug personalities nga niresulta sa pagkasakmit sa 158.87 gramos nga shabu nga dunay standard drug price nga P1,080,316.
Wala usab nila lugaki ang paggukod sa illegal gambling, diin nakasikop sila'g 68 ka mga sugarol ug moabot og P4,597 ang naimbargo nga kwarta isip sugal.
Samtang naka usad ang CCPO og 52 ka operations batok sa mga tawo nga dunay mga pending warrant of arrest sa lain-laing mga kaso nga giatubang sa korte nga mi resulta sa pagkasikop sa 62 ka mga akusado, 16 kanila giila nga mga most wanted person.
Matod ni Police Lieutenant Colonel Janette Rafter, deputy city director for operations sa CCPO, nga ilang gitunga ang ilang personnel diin ang kapin sa 300 maoy gitahasan sa pagbantay sa mga kalihukan sa Semana Santa sa dakbayan sa Sugbo samtang ang uban ninglusad sa anti-criminality operations.
Gawas sa mga nakauniporme nga polis nga nagbantay sa mga simbahan, lakip na sa religious sites sa dakbayan, duna usab silay gipangtahasan nga personnel nga nakasibilyan lang nga maniid sa mga kriminal. / AYB