Gipadad-an sa Commission on Elections (Comelec) sa Central Visayas og notice ang 156 ka mga kandidato ug mga politikanhong partido sa local ug national tungod sa pagpamutang og campaign materials sa gidili nga mga lugar sukad niadtong Marso 29 hangtod sa Abril 4, 2025.
Sa kinatibuk-an, 35 ka notice ang gipadala sa Bohol ug 121 sa Cebu, sumala ni Comelec 7 Director Francisco Pobe sa interview sa SunStar Cebu niadtong Martes, Abril 8.
Ang maong gidaghanon sa mga kandidato ug partido nga patubagon sa Comelec nakumpirmar sa ilang mga provincial election office nga maoy nisusi sa ilang mga kalapasan.
Ang mga notice giluwatan nunot sa Oplan Baklas, ang nationwide operation sa Comelec nga manangtang sa mga campaign materials nga nakalapas sa balaod sa eleksyon.
Ang ilang operasyon gidungan sa pagsugod sa national campaign period niadtong Pebrero 11 ug sa local campaign period niadtong Marso 28.
Moabot sa 8,796 ka mga poster ug tarpaulin ang gipanangtang sa tibuok rehiyon 7 atol sa usa ka semanang operasyon nga 1,995 sa Bohol ug 7,241 sa Cebu.
Matod ni Pobe nga sagad makita ang mga campaign poster nga gipamutang sa mga punoan sa kahoy ug poste sa kuryente nga gawas na sa gitugot nga common poster areas.
Ubos sa Comelec guidelines, ang mga campaign material gitugot lang sa common poster areas, private property, ug private residences nga dunay pagtugot sa tag-iya.
Kon gipamutang sa laing lugar, kalapasan na kini sa Fair Elections Act.
“I’d like to believe they complied because so far, we have not received reports from our election officers indicating otherwise. In fact, most candidates have already taken down the materials after being notified,” matod ni Pobe .
Sigon niya nga tanang kalapasan nga madokumento ilang isumiter sa Comelec central office sa Manila nga maoy moluwat og show cause orders.
“If they fail to respond properly, they could face disqualification complaints,” dugang ni Pobe.
Gipahinumdoman usab ni Pobe ang mga kandidato nga dili mangampanya atol sa Semana Santa. / CAV