Gibanabana nga 15,000 ka mga benepisyaryo gikan sa 3rd District sa Cebu ang gilaumang makapahimulos sa “Padayon Jud ang Kahimsug” nga medical mission nga gipasiugdahan ni Congresswoman Karen Garcia ug kanhi Congressman Pablo John “PJ” Garcia.
Ang medical mission nagtanyag og libreng serbisyo sama sa libreng konsultasyon, laboratory tests, ug libreng tambal.
Lakip sa mga serbisyo ang libreng maintenance medicines sulod sa tulo ka bulan nga suplay, laboratory tests sama sa X-ray, ECG, urinalysis, blood chemistry, ug fetal Doppler alang sa mga mabdos, ug professional medical consultation gikan sa mga eksperto sa 1Life Community Healthcare Management System.
Ang mga pasyente nga dili miyembro sa PhilHealth mahimong mo-fill up og porma sa mismong event aron mahimong kwalipikado sa mga benepisyo sa maong ahensiya.
Ang mosunod ang mga petsa ug lugar sa medical mission sa Agusto 8: Barili, Agusto 12: Aloguinsan, Agusto 15: Pinamungajan, Agusto 19, 20, 21, ug 23: Toledo City, Agusto 25: Balamban, Agusto 28 ug 29: Asturias, Septiyembre 4 ug 5: Tuburan. / AYB