Menor de edad nga dalaga nipasangil sa usa ka lalaki nga minyo nga nilugos kaniya sulod sa kasilyas sa alas 4 sa hapon sa Miyerkules, Mayo 15, 2024, sa Brgy. Catarman, lungsod sa Liloan, amihanang Sugbo.
UPDATE:
Ang suspek nga nadakpan sa kapulisan giila nga si Carl Dave Talotalo Cañares, 28, taga Brgy. Lahug, Cebu, City, glass installer. Siya nasikop alas 4:30 sa hapon sa Huwebes sa iyang gitrabahoan sa Poblacion, Liloan.
Si Police Major Eric Gingoyon, hepe sa Liloan Police Station nga nahinabi sa Superbalita Cebu, niingon nga ang 16 anyos nga dalaga nga tinun-an nitabang sa iyang inahan sa pagpamaligya og pagkaon.
Niadtong higayuna sa balay sa ilang amo, gitawag siya ni Cañares ngadto sa comfort room (CR) ug sa iyang kahadlok, siya nituman.
“Una daw gihikap iyang paa sa suspek. Nakuratan siya. Nisulod ning suspek sa CR, gitawag siya, gipasulod (sa CR),” dugang ni Gingoyon.
Matod sa biktima nga nagpasulabi ang iyang kahadlok hinungdan nga wa siya nakasinggit. Giingon nga nahilabtan ang dalaga ug nianang pagka Huwebes, siya nisumbong sa iyang inahan.
Gipahiling siya sa Pink Room sa Vicente Sotto Memorial Medical Center (VSMMC) sa Women and Children Protection Desk (WCPD).
Ang suspek giingon nga niangkon sa kremin kay naibog siya sa biktima. / GPL