16 anyos namusil kay nag-ilog sa babaye

16 anyos namusil kay nag-ilog sa babaye
Image from Google Maps

Duha ang samdan, apan usa niini napagan lang, sa pagpamusil sa usa ka 16 anyos sa duha ka mga sakop sa VTC Crips gang sa Barangay Pulpogan, lungsod sa Consolacion, amihanan sa Sugbo, alas 12:10 sa kaadlawon, Dominggo, Mayo 26, 2024.

Usa sa samdan mao si Kent Ashly Guinto, 19, sakop sa gang ug molupyo sa Pulpogan.

Samtang naangin sa pagpamusil mao si Inosentes Covarde, 49, residente usab sa samang dapit.

Ang suspek nga 16 nga sakop sa laing gang ug taga Barangay Casili, Consolacion.

Si Police Lt. Col. Ruel Burlat, hepe sa Consolacion Police Station nga nahinabi sa Superbalita Cebu, nagkanayon nga panag-ilog sa usa ka babaye ang hinungdan sa krimen.

Sumala sa kapulisan, ang suspek kanhi kauban sa gang sa biktima, niabot sa dapit aron mamisita sa usa ka babaye.

Si Kent kauban sa pipila ka kauban sa gang nag-estambay daplin sa dan ug ilang gipareg­lahan ang suspek dihang niagi, atol sa kumosyon, namusil ang suspek.

Naigo sa ulo si Kent apan napagan si Covarde nga diha duol sa dapit ug naigo sa tuong bahin sa lawas.

Gidala sila sa Eversley Child Sanitarium Hospital sa dakbayan sa Mandaue. Luwas na hinuon ang mga biktima.

“Suyaay ba kay namisita ning suspek. Kanang babaye giilogan nila, giatangan pag-uli,” dugang ni Burlat.

Atol ning pagsuwat, gipa­ngita sa kapulisan ang suspek nga menor de edad. / GPL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph