Lalaki nga menor de edad nga gitumbok nga responsabli sa pagpusil-patay sa 23 anyos nga babaye sa Dalan General Genis, Barangay Suba, Dakbayan sa Sugbo, niadtong Sabado, Marso 9, 2024, sa alas 5:20 sa buntag, giila nga hitman kun gun-for-hire sa maong lugar.
Kahinumdoman ang biktima nga si Maylen Gomalao, trabahante sa usa ka bilyaran sa lugar, nag-abang og kwarto, gipusil sa dihang padung na siya matulog.
Nisulod ang gunman sa iyang kwarto ug dayon gipusil.
Namatay diha-diha ang biktima sa iyang samad pinusilan sa ulo samtang ang killer dali nga nisibat.
Matod ni Police Lt. Colonel Janette Rafter, deputy city director for operations sa Cebu City Police Office (CCPO), nga dunay nakakita sa gunman ug maoy nihatag sa kasayuran sa Sawang Calero Police Station.
Base sa record sa kapulisan, nalambigit ang gunman sa duha ka mga kaso sa pagpamusil ubos sa hurisdiksyon sa Sawang Calero Police Station, usa ani napasaka na nga mao ang frustrated murder.
Sila nagpaabot sa ipagawas nga warrant of arrest sa korte aron pagdakop kaniya.
Ubos sa balaod, ang 16 anyos nga nakahimo og krimen mapasakaan og kaso kon masuta sa evaluation nga duna siyay kahiamgo sa paghimo sa krimen.
NASAYPAN
Gitug-an ni Police Major Francis Renz Talosig, hepe sa Sawang Calero Police Station, nga nakadawat sila og impormasyon nga nahimo’ng gun-for-hire ang menor.
Nasaypan, matod pa, si Gomalao nga asset sa kapulisan human dunay nadakpan nga drug personality sa dapit diin siya ang gidudahan nga nitug-an sa mga otoridad. / AYB