LABING menos 16 ka 55-inches nga LED TV ang nangabasa sa baha sa basement sa Department of Education-Cebu City Division Office sa Imus Avenue, Barangay Day-as. Nahitabo kini human sa kusog nga pagbaha sa siyudad niadtong Hulyo 16, 2025.
Si Bise Mayor Tomas Osmeña, kauban sila Konsehal Harold Go ug kanhi Konsehal Joy Augustus Young, nangulo sa inspeksyon sa mga TV unit niadtong Biyernes.
Kini nga mga TV unit gituohan nga sobra gikan sa 2024 Palarong Pambansa, diin ang Cebu City maoy nag-host. Gitaguan kini sa basement sa DepEd-Cebu City Division, kung asa usab nahimutang ang Division Health & Nutrition Clinic.
Sa usa ka interbyu sa mga tigbalita, gibutyag ni Osmeña nga ang iyang grupo kasamtangang nanguha og impormasyon bahin sa insidente.
Matod niya, ang Cebu City’s Commission on Tourism gustong mosud sa compound, apan di sab niya pasagdan nga bahaan ang clinic.
Gisugyot ni Osmeña nga tapakan ang bisan unsang mga gintang sa School Division Building aron mapugngan ang umaabot nga pagbaha.
Ang pagkabasa sa mga TV unit sa baha posibleng nangadaot, ug kini ibasol sa kakuwang sa storage space sa building.
Ang kakuwang sa storage area tungod sa padayon nga pag-okupar sa Cebu City Tourism Commission sa usa sa mga building sa city hall nga tapad sa School Division.
Ang DepEd-Cebu City Division sa Imus Avenue usa sa mga edipisyo nga nakasinati og grabeng pagbaha nga nisulod sa building. / EHP