Human si Presidente Rodrigo Duterte nitunga sa pre-trial hearing sa International Criminal Court (ICC) niadtong Biyernes, Marso 14, 2025, usa ka human rights activist nanawagan sa mga pamilya sa biktima sa extrajudicial killings (EJK) pagpasaka og kaso.
Kini ang panawagan ni Neri Colmenares, usa ka human rights lawyer nga nagsilbing Bayan Muna Party-list congressman sud sa siyam ka tuig, atol sa press conference niadtong Sabado, March 15, sa United Church of Christ in the Philippines sa Cebu City.
Sa 16 ka pamilya gikan sa Metropolitan Cebu nga nisang-at og kaso batok ni Duterte pinaagi sa Rise Up for Life and Rights Organization to the ICC, si Colmenares nagkanayon nga ang dugang mga reklamo makapalig-on sa kaso batok sa kanhi presidente.
“Mas maganda if marami kasi that will further prove the case,” matod niya.
Iyang gipasabot nga sa 100 ka kaso nga masang-at og lima niini ang lig-on kaayo, igo na nga makapakombikto.
Matod ni Colmenares nga ang tanang reklamo kinahanglan nga isang-at sa di pa ang confirmation of charges hearing, nga gitakda sa September 23.
Kining maong proseso maoy moila kon duna bay lig-ong mga ebidensiya aron ipadayon ang husay sa kaso.
“Malaking kasiyahan sa pamilya na at last natuloy ang hearing ni President Duterte kagabi. Matagal na nilang hinihingi yan,” dugang ni Colmenares.
Matod ni Colmenares nga di mabasol ang mga pamilya nga nisang-at og reklamo batok kang Duterte ngadto sa ICC tungod kay nanawagan sila og hustisya nga wa mahatag sa Pilipinas alang sa sakop nilang gipamatay. / JPS