Moabot na sa 1,672 ka mga armas, 57 ka explosives ug 3,668 ka mga bala sa lain-laing kalibre ang nasakmit sa kapulisan sa Central Visayas atol sa subsob nga operasyon batok loose firearms sulod sa unom ka buwan gikan sa Enero ngadto sa Hunyo 2025.
Sa datos nga gipakita sa Police Regional Office (PRO) 7 nakalusad na sila og 1,642 ka operations nga nag-target sa mga grupo nga naghupot og mga paltik nga armas ug mga eksplosibo.
Matod ni Police Brigadier General Redrico Maranan ang hepe sa PRO 7 nga iyang gidayeg ang iyang mga sakop nga nakasakmit sa maong gidaghanon sa mga armas.
Lakip sa iyang gipasalamatan ang publiko nga aktibo nga nakig-alayon sa mga polis kung dunay makuha nga impormasyon labot sa mga naghupot og armas sa ilang dapit.
“Every operation is backed by reliable information, carried out with professionalism, and strengthened by the support of the public. Each weapon taken off the streets means one less threat to peace. Each arrest is a step closer to a safer community,” matod ni Maranan.
Gihimug-atan usab ni Maranan nga ang maong kampanya kabahin sa kamanduan ni PNP Chief Police General Nicolas Torre III aron masiguro ang siguridad pinasikad sa subsob nga kampanya batok loose firearms.
“These accomplishments represent lives protected and crimes prevented. We call on our communities to remain vigilant, report suspicious activities, and continue working with us to build safer neighborhoods,” dugang ni Maranan. / AYB