Liboan ka mga empleyado sa Cebu City Hall ang wala pa makabalik sa trabaho sugod niadtong Martes, Hulyo 1, 2025, human sa pagbag-o sa administrasyon.
Gikumpirmar ni Henry Tomalabcad, pangulo sa Human Resource Development Office sa usa ka interbyu nga gibana-banang 1,400 sa 3,000 ka temporaryong empleyado ang gihatagan og reappointment papers niadtong Martes, sa unang mga adlaw human sa pagbalhin sa administrasyon.
Matod ni Tomalabcad nga gibase kini sa listahan gikan sa Office of the Mayor ubos ni Cebu City Mayor Nestor Archival.
Dugang niya nga nagpaabot pa ang HRDO og dugang nga listahan sa mga temporaryong empleyado kansang mga appointment ipadayon.
Apan giklaro ni Tomalabcad nga wala i-renew ang appointment sa gibana-banang 1,600 sa 3,000 ka Job Order (JO) nga empleyado.
Ang mga JO nga empleyado mao ang mga trabahante sa City Hall nga gibase sa proyekto o programa.
Gibana-bana nga 2,000 ka regular nga empleyado ug nagkadaghan nga mga reappointment ang nakabalik na sa operasyon sa City Hall.
Sa usa ka interbyu sa mga tigbalita niadtong Martes, Hulyo 1, 2025, si Archival niingon nga pipila ka mga JO ang nagtapok sa lobby sa City Hall, naglaom nga ma-renew ang ilang mga appointment.
“Ang nag-screen ana kay ang Office of the Mayor ra gyud ug HRDO kay kutob ra mi sa pagdawat sa ilahang lista. Sila na nagpili kinsay i-renew,” matod ni Tomalabcad.
Gipasabot niya nga lakip sa mga criteria, gibase sa gidugayon o mga tuig nga ang mga casual nga empleyado unang gihatagan og appointment papers. / EHP