Patay ang usa ka 17 anyos nga ulitawo nga gidudahang notadong kawatan sa dihang gipusil samtang nanglaba, alas 4:34 sa hapon, Dominggo, Pebrero 16, 2025, sa Sityo Didos, Barangay Linao, Siyudad sa Talisay.
Ang biktima giila nga si Andrew Bentulan Galicia nga lumolupyo sa maong dapit.
Ang kapulisan sa Talisay nakadawat og tawag gikan sa barangay tanod sa Linao nga nagpahibalo sa pagpamusil .
Pag-abot sa kapulisan sa crime scene, naabtan ang biktima nga nagbuy-od na sa hawanan nga may samad pinusilan sa iyang walang paa ug walang bukton.
Basi sa assessment sa Emergency Medical Services (EMS) personnel nga gipangulohan ni Arvin Lastimosa, ang biktima nakabsan sa iyang kinabuhi.
Ang 16 anyos nga kapuyo sa biktima nibutyag nga samtang nanglaba sila, kalit lang nitumaw ang wala mailhing lalaki ug namusil.
Gipusil sa makadaghang higayon ang biktima ug nisibat dayon ang mamumuno nga naglakaw lang paingon sa Camella Subdivision.
Ang biktima duna nay record sa pagpangawat sa Talisay ug City Cebu Police Station .
Nasayran nga duna nay kasong robbery ang biktima ug ang kapulisan sa Talisay nagpaabot na lang sa warrant of arrest aron kini ilang madakpan. / DVG